Dewleta tirke ya îşxalkere vizêr qezaya Seyîdsadiqî ya Silêmanî ya Başûrê Kurdîstanî de weaayîtê rojnamegeran dabi bombayan ver. Qirkerdiş de rojnamegerî Gulistane Tara û Hêroye Bahadîn şehîd bibî.

Nêrazîbîyayîşê vera qirkerdişê rojnamegeran ê dewleta tirke dewam kenê. Rêxistin û dezgehan vera îşxal û faşîzmî mesajî dayî.

Mesajî wina yê:

Kongreya Starî: ''Ma nê hêrişê dewleta tirke ya faşîste û hemkarê ci PDKyî şermezar kenê. Dewleta îşxalkere bi hêrişanê vera cinîyan, rojnamegeran, sîyasetmedaran û serkêşanê komelî şinasîyena. Dewleta tirke bi nê hêrişî ancî sûcê şerî kerd û waşt ke şexsê cinîyan de îradeyê komelî bişikna. Ma venga şar û cinîyanê Başûrê Kurdîstanî danê ke vera hêrişanê Tirkîya tewir bigêrê.''

Rêxistina Rojnamegeranê Sînornenasan (RSF): ''Rojêke dima ke RSFyî derheqê zêdîyayîşê şîdetê vera rojnamegeran de hişyarîye daye Herêma Kurdîstanî di rojnamegerî ameyî qetilkerdene. Wezîrîya Pawitişî ya Tirkîya Agence France-Presse (AFP) rê pare kerd ke hêriş hetê dewleta tirke ra ameyo kerdene. Ganî selahîyetdarê dewleta tirke hesab bidê. Ganî rojnamegerê kurdî bipawîyê û seba Hêro û Gulistane edalet bêro caardene.

Komîteya Pawitişê Rojnamegeran a Mîyanneteweyîye (CPJ): ''Selahîyetdarê dewleta tirke ganî cade nê hêrişî tehqîqat bikerê û ganî dîyar bikerê ke nê rojnamegerî xebatanê xo ra semed ameyê hedefkerdene yan ney.''

YNK: ''Ma sey Fraksîyonê Yewîya Niştemanîya Kurdîstanî (YNK) nê hêrişî şermezar kenê. Hêrişê winayênî meşrû nîyê û serdestîya erdê Iraqî binpay kenê. Ma venga hukmatê Federalî danê ke bêvengîya vera binpaykerdişanê serê Iraq û Herêma Kurdîstanî bişikno û cuya sivîlan bipawo.''

Komîteya Çapemenîye ya KNKyî: ''Dewleta tirke kamera û qelemanê rojnamegeran ra tersen. Ma nê sûcanê dewleta tirke û hukmatê AKP-MHPyî bi tûjî şermezar kenê. Ma soz danê ke do nêverdê meşaleya rojnamegeran hewna şora. Ma do têkoşînê nînan seba eşkerakerdişê raştîya faşîzm û îşxalê dewleta tirke bidomînê.''

Endamê Heyetê Rayberdişî yê YNKyî Arêz Abdullah: ''Dewleta tirke ya îşxalkere erdê ma ser de tehlukeyêko pîl o û erdê Başûr û Iraqî de îşxalker a.''

Sîyasetmedar Ethem Barzanî: ''Hêrişê vera rojnamegera sûcê vera qanûnan û krîteranê heqanê merdiman o. Ez venga komelê mîyanneteweyî dana ke vera nê binpaykerdişan sînorêkê cidîyî awan bikerê.''