Kongreya Komelê Demokratîkî (KCD), Partîya Herêman a Demokratîke (DBP), Partîya Demokratîke ya Şaran (HDP) û Têgêrayîşê Cinîyan ê Azadan (TJA) derheqê Newrozî de kombîyayîşêk kerd û da zanayene ke Newroze do Amed de bêro destpêkerdene.

Kombîyayîşo ke banê HDPyî yê Amedî çapemenîye rê qefilnaye ame kerdene de qerar ame girewtene ke emser do temaya bingeyêne ya Newroze tecrîdê serê Rayberê Şarê Kurdî Abdullah Ocalanî, zextê vera ziwanê dayîke û yewîya neteweyîye bê.

Şayîyê Newroze zî do 11ê adere de Amed bi kombîyayîşê çapemenîye bêro destpêkerdene. Kombîyayîşo ke do Demir Otelê Sûrî de bêro kerdene do hemserekê HDPyî Pervîne Buldan û Mîthat Sancar, hemserekê KCDyî Leyla Guven û Berdan Ozturk û hemserekê DBPyî Salîha Aydeniz û Keskîn Bayindir û temsîlkarê partîyanê bînanê ke xebatê îtîfaqê Kurdîstanî de ca gênê tewrê ci bibê.