Gerîla Delîl pê hîkayeyanê Şêx Seîd, Seyîd Riza, Îhsan Nûrî, Qazî Mihemedî bi pîl û mezg û zerrîya ci de tim nakokî û meraq estbî. Delîlî wexto ke Zanîngehê Anqara de beşê fîzîkî wendêne PKK şinasna. Seba ey PKK zaf xerîb ameyêne, xo nêzdîyê çepê tirkan dîyêne. La zanîngeh de nasnameyê xo yo raştikên dî û tewrê Têkoşînê Azadîye yê Kurdan bi.Delîlî hînî fam kerdêne ke o terefê PKKyî de eşkeno qesasê Seyîd Riza, Şêx Seîd û Qazî Mihemedî bigêro.

Embazêkê ey wina qala Delîlî keno: ''Embaz Delîl kesêko zerrînizm bi, hayîya ey pê raştîye estbî û bi nê hawayî tewrê cuye bi. Wisarê serra 2000î de perwerdeyê gerîlayan ê neweyan qedîna. O çax şîyayîşê Vakurî zaf kêm bîyî. Embaz Delîlî tim waştêne ke bibo gerîlayêko hol û bawer kerdêne ke têkoşîno raştikên Vakur de yo pê israr û qerardarîya xo hamnanê serra 2000î de derbazê Vakurî bi. Hêverî o herêma Botan de Besta de bi wezîfedar. Seba ey çîyêko tewr zehmet qiseykerdişê kurmanckî bi. Çunke înan keyeyê xo de kirdkî qisey kerdêne. Serra 2003î de wexto ke mi o dî hînî eşkîyayêne kurmanckî xo îfade bikero.

Xeylêk hetan ra Besta seba ey warê gaman ê verênan ê PKKyî bîye. Zafê vîrameyîşê ey ê rindî Besta de qewimîyî. Embaz Delîl serra 2004î de şi perwerde. Dima ke tewrê dewreyêkî bi waşt ke şoro Dêrsim. Pêşnîyazê ey hetê rêxistina ci ra ame qebulkerdene û hamnanê 2005î de derbazê Dêrsimî bi. Pê hêzê Botanî bi coş û kelecanêkê pîlî Dêrsim de dest pê gerîlatîye kerd. Serra 2007î de Dêrsim de tewrê karwanê bêmergan bi.''