Heyetê HDPyî ke Vervatoxa HDPyî Ebru Gunay, Wekîlî NEcdet Îpekyuz û Alîcan Onlu ra yeno pê, pêvînayîlê xo yê Dêrsimî temam kerdî. Heyeto ke mîyanê roje de esnafî û hemwelatîyî zîyaret kerdî, peynîya bernameyê xo de zî temsîlkarê rêxistinanê komelê sivîlî dîyî. Kombîyayîş salonêka dewatî de ame kerdene.

Vervatoxa HDPyî Gunaye kombîyayîş de qisey kerd.

Ma do qîrayîşê Munzur û Cûdîyî bikerê yew

Gunaye verî bale ante tarîx û xoverdayîşê Dêrsimî ser û vat: ''Dêrsim de xoverdayîş û bedelî est ê. Ma erdê Seyîd Rizayî de yê. Seyîd Riza, Elîşêr û Zarîfa, Aysele Dogan... Ê serkêşê ma yê û ma rayîrê înan de yê. Ma vînenê ke Munzur de pê polîtîkayanê asayîşî qirkerdiş yeno kerdene. Wayîrvejîyayîşê Cûdî û Munzurî, vera rantê îqtîdarî vervejîyayîş o. 17ê êlule de seba wayîrvejîyayîşê Cûdîyî ma do şorê. Ma do qîrayîşê Cûdîyî û Munzurî bikerê yew û vengê têkoşînê hemparî berz bikerê.''

Gunaye da zanayene ke AKP-MHP do nêeşko pê polîtîkayanê dişmenî ser bikewo û vat: ''Netîceta polîtîkayanê şerî de wêrankerdişê xoza qewimîyeno. Tecrîd sere de Girawa Îmraliyî de serê Birêz Ocalanî de û pêro Tirkîya de vila bîyo. No welat pê polîtîkayanê tecrîdî bin keweno. Pêvînayîşê bi Ocalanî do Tirkîya rê fayde bikero. Vervejîyayîşê qirkerdişê xoza, tecrîd û polîtîkayanê şerî yeno manaya vervejîyayîşê faşîzmî.

Dêrsim pê kulturê xo yê xoverdayîşî verê çiman de yo. Ma Îtîfaqê Kede û Azadîye de yê. Hayîya ma pê est a ke ganî seba ziwan, kultur û vera asîmîlasyonî xetêka têkoşînê hemoarî bêra awankerdene. O zî îtîfaqê demorasî yo. Têkoşîno hempar ê Dêrsimî helbet do seba pêro Tirkîya bibo îlham.  Kesê ke nasnameyê înan û ziwanê înan çin hesibîyenê mehkumê sîyasetê îqtîdarî û muxalefetî nîyê. Vera înan awankerdişê Rayîrê Hîrêyînî mumkîn o. Ma seba ney tîya de yê û ma wazenê goş bidê ney ser.''

Kombîyayîşî ra dima zîyaretê Dêrsimî yê heyetî qedîya.