Seba azadîya Rayberê Şarê Kurdî Abdullah Ocalanî û paştdayîşê grevê vêşanîye yê tepişteyan xeylêk şaristanan de Nobetê Edaletî yenê kerdene.

Amed de zî bînaya DEM Partî ya qezaya Rêzanî de dadî û merdimê tepişteyan Nobeta Edaletî de yê. Dadîyan ANFyî rê qala çalakîya xo kerde.

Dayîke Afîfe Kartala ke lajê ci Muhammet Kartal Zîndanê Antalya de tepişte yo vat: ''Pêvînayîşê ma yê verênî de moralê lajê mi cade bi. Lajê mi 10 rojanê grevê vêşanîye de 6 kîloyî dayî. Îdareyê zîndanî awe û solî nêdano tepişteyan. Ma sey dadîyan teyna edaletî wazenê. Ma wazenê ke wa Rayber Apo bieşko keye û avûkatanê xo bivîno. Heta ke domanê ma grevê vêşanîye rê dewam bikerê ma zî Nobeta Edaletî bikerê. Bêrê ma na çalakîye pîlêr bikerê.''

Zekîye Yilmaz vat: ''Wa îşkenceyê Tirkîya biqedê.  Wa heqê tepişteyan bêrê dayene. Dewlete bi huqûqê dişmenîye nêzdîyê ma benê. Domanê ma îşkence û zulmî vînenê. Domanê ma bi neheqî erzîyayî zîndanan Ma do têkoşînê xo rê dewam bikerê. Ma nê zulmî qetî do qebul nêkerê.''

Fatma Adak vat: ''Rayber Apo tecrîdkerde yo, ma ney şermezar kenê. Tepişteyê sîyasîyî zî tecrîdkerde yê. Ma wazenê ke tecrîdê vera Rayber Apoyî û domananê ma bêro wedaritene. Seba paştdayîşê domananê xo ma tîya de yê. Ma venga şarê xo danê ke wa wayîrê îradeyê xo vejîyo û zulmê dewlete qebul nêkero.''

Fatma Çagir vat: ''Tecrîdê vera Rayber Apoyî ganî cade bêro wedaritene. Seba ke tecrîd wedarîyo ma tîya de yê. Sey dadîyan ma paştî danê grevê vêşanîye yê domananê xo. Domanê ma zîndanan de, ma zî teber de do têkoşînê xo rê dewam bikerê.''