Endamê Komîteya Kultur û Hunerî yê PKKyî Nurettîn Demîrtaşî bi wesîleya serragêrayîşê 40. ê PKKyî ANFyî rê ercnayîşî kerdî.

PKKYÎ UMÎDÊ XOVERDAYÎŞ, SERFIRAZÎ Û SERKEWTIŞÎ AFERNA

Endamê Komîteya Kultur û Hunerî yê PKKyî Demîrtaşî ard ziwan ke PKK sere de seba şarê kurdî seba şaranê rojakewtena mîyanêne têgêrayîşêkê azadîye û demokrasî yo. Demîrtaşî vat ke şaranê ke PKKyî ra îlham û hêz girewt bi nê resayî îmkanê afernayîşê cuya seypêye.

Demîrtaşî nê vatî: “PKK aqilêko nêbinkewte yo ke xo bi wijdan, qehremanîye û cesaretî bihêz kerdo. Hetêk ra hemverê dinyaya bêwijdane de wijdan, hemverê dinyaya madîye de manewîyat o, hetêna ra zî aqil û têgêrayîşêk o ke hemverê tu problemêk de xo bêçare nêverdano. Têgêrayîşê wijdan û aqilî yo. No hal cewherê sosyalîstî yê PKKyî ra yo. Ewro şarê dinya zî nê vînenê.”  

“EZ SEBA RIJÎYAYÎŞÊ FAŞÎZMÎ, AZADKERDIŞÊ KURDISTANÎ VENG DANA”

Dewamê qiseykerdişê xo de Demîrtaşî vat: “Emperyalîzm û kapîtalîzmo global çiqa wazenê PKKyî krîmînalîze bikerê wa biwazê, PKKyî temamê şaranê dinya mîyan de sey têgêrayîşêkê azadîye cayê xo girewto.

PKKyî hetêk ra bi umîdê merdimayîye, hetêk ra zî bi newe ra ercnayîşê Sosyalîzmî bi serkêşê Sosyalîzmê Îlimkî û Demokratîkî. Seke Rayber Apo zî vano ‘Sosyalîzm de israrkerdiş merdim bîyayîş de israr kerdiş o.’ Ma bawer kenê ke bêşik ma do serê xeta PKK û Rayberîye de û binê beyraqa Sosyalîzmî de bi ser bikewê.

Ez reyna veng dana her kesî ke cewherê sosyalîstî, komelkîye û cehwerê demokratîkî yê PKKyî hîna nizd ra nas bikerê. Bitaybetî zî tecrîdê serê Rayber Apoyî bişiknê, faşîzmî birijnê û Kurdistanî azad bikerê.”

DÎKTATORÎYA ERDOGAN-BAHÇELÎ DO BIRIJÎYO

Demîrtaşî ard ziwan ke xeta neteweya demokratîke ya Ocalanî do şerê hîrêyin ê dinya de qedera Rojakewtena mîyanêne û dinya bivurno û vat: “Gerîlayê azadîya Kurdistanî do çirey fek pawitişê şaran ra vera nêdo. Bi serkêşîya ciwan û cinîyan, bi mucadeleyê Sosyalîzmî û mucadeleyê merdimîye bêşik do faşîzm birijîyo. Tu dîktatorîyêka faşîste nêeşkaya bimano. Dîktatorîya Erdogan-Bahçelî zî do nêmano. Ganî dîktatorîya Erdogan-Bahçelî bizano ke ê do refanê tarî û bitozî yê tarîxî de bica bibê û nêeşkê xo rijîyayîşî ra bixelesnê.”

Demîrtaşî wina dewam kerd: “Şarê ma do bibo şahidê rijîyaîşê dîktatorîya Erdogan-Bahçelîyî. Ne ters, ne zext, ne kiştiş û ne zî qirkerdiş do netîce nêgêro. Çîyo ke bewlîkerdox o xoverdayîşê şaran o hempar o. Çîyo ke do qedera ma bewlî bikero pîlîya xoverdayîşê ma ya. Heta ruhê azadîye xurt bibo mumkun nêyo ke faşîzm netîce bigîro. Na yewe ra ê ruhê PKKyî ra tersenê. Bingeyê tersê înan de hişmendî, cesaret û ruhê Rayber Apoyî esto. Semedê nê azadîya Rayber Apoyî do bêro manaya azadîya Kurdistanî û heme şaran. Ganî kesê ke roşinvîr, demokrat, femînîst û çepgêr ê cepheyêkê demokratîkî pêşnîyaz bikerê û nê cepheyî de bêrê têhet. Cehdo tewr manîdar no yo…”

HUNERMENDAN RÊ VENGDAYÎŞ

Endamê Komîteya Kultur û Hunerî yê PKKyî Demîrtaşî vat ganî hunermendî xo madîyat ra dûrî bifînê û nê ardî ziwan: “Warê hunerê  şorişgêrî de xeylî kede dîyaya û fedakarîyî ameyê kerdene. Ganî nê ercan rê wayîr bêro vetene. Sere de ciwanê Kurdistanî heme ciwanî wa tembûrê xo, gîtarê xo û kemanê xo bigîrê bêrê, mucadeleyê sosyalîzmî hîna bikerê pîl û faşîzmî birijnê.”