Endamê Konseya Rayberdişî ya KCKyî Sabrî Okî rewşa Sûrîye û Rojawanî ANFyî reyde ercnaye.

Sabrî Okî bi kilmêkî nê noqtayan ser o vindert: ''Rojhelatê Mîyanênî de Şerê Dinya yo Hîrêyîn dewam keno. No şer şerê hêzanê hegemonan o. Rojhelatê Mîyanênî de raşt a zî ronesansêk yeno meydan. Tekoşîno ke bi paradîgamaya neteweyê demokratîkî ya Rayber Apoyî yeno kerdene pêro şar hîşyar kerd û rayberîya şarî keno. Xeta rayberîye înan rê lîderîye kena.Newe ra dîzynkerdişê Rojhelatê Mîyanênî de şarê herême sey se serrî verî bêîrade, bêrêxitin û bêhez nê prosesî pêşwazî nêkeno. Kurdê ke se serrî verê cû seke çin ê ameyêne hesibnayene bi awankerdişê cuya xo ya demokratîke têkoşînê demokratîkbîyayîşê Rojhelatê Mîyanênî de bi waştişî, bawerî û qerardarî rolê rayberîye anê ca.

Erdogan rewşêka krîtîke û xirabe de yo. Erdogan texmîn nêkerdêne ke Rûsya Îdlîb de cewabê hêrişanê ci bida. Rûsya Tirkîya rê rayîrê hewayî padayî û Tirkîya xo tepîya ant. Eke wina nêbîyêne artêşa tirke bi hawayêkê hîna xurtêrî bin kewtêne. Reyna zî Îdlîb de 120 kişteyî û birîndarê dewleta tirke estê. Bêgûman no seba dewleta tirke vînkerdişêko pîl o.  Eşkera yo ke Erdogan pêvînayîşê Moskova de hetê moralî ra çin bi û hetê psîkolojîkî ra vîn kerd. Erdoganî Moskova de vîn kerd.

Îdlîb stratejîk o. Rûsya û rejîm tira fek vera nêda. NATOyî zî Îdlîb de paştî nêda Erdoganî coka dewleta tirke Îdlîb de kewte tengasîye. Destê Erdoganî de têna kartêk mend, o zî babeta kurdan o. Estbîyayîşo azad û statuyo azad ê kurdan, modelê Rojawanî. Hesabê ERdoganî yê Sûrîye têna nînan ser o yê. Seba ke Şorişê Rojawanî tasfîye bikero çîyêk çin o ke Erdogan ci ra tawîz nêdo, eşkeno seba naye her çi bikero.

Rojhelatê Mîyanênî de nika hîşmendîya kurdan a demokrasîyî zaf berz a. Kurdî o şar o ke cuya azade û demokratîke wazenê û wayîrê qerardarîye û paradîgmaya têkoşînî yê. No zaf girîng o. Kurdî neteperwerîye ra dûrî vindenê û seba azadîye û demokrasîyî têkoşîn kenê. Coka verê kurdan akerde yo. Kurdan seserra 20. de bin kewt la seserra 21. de do ser bikewê. Eke Rûsya kurdan nêvîna, têgêrayîşê kurdan peygoş bikera a zî do vînî bikera.DYA tim bi îxanetanê xo yê vera kurdan yena vîrî. DYA bi hawayêkê îdolojîkî nêzdîyê kurdan bena.

Kam çi vano wa vajo eke kurdî û şarê Rojawanî nêbê mumkîn nîyo ke meseleyêke bêra çareserkerdene. Şarê Rojawanî pê xo zaf bawer ê. Tesîrê Şorişê Rojawanî, têkoşînê vera DAÎŞî, çêrîya cinîyanê kurdan seba merdimîye bîyî wayîrê cayêkê pîlî. Bi pêhesîyayîşê na raştîye DYA bikera ke herinda ke paştî bida kurdanê Rojawanî tewr nêbo seba pêkerdişê kurdanê Rojawanî )Rojawa-ENKS) bieşka rolêk kay bikera. Binê nê hesabî de polîtîka û konseptê cîyayî estê.Kurdî çend xurt bibê hem demokratîkkerdişê Rojhelatê Mîyanênî de do bibê wayîrê rolî hem zî nê esasî ser o do bieşkê Rûsya, DYA û hêzanê bînan reyde têkilîye bikerê.''