Wekîlê HDPyî yê Riha Omer Ocalan o ke birazîyê Rayberê Şarê Kurdî Abdullah Ocalanî yo zî derheqê tecrîd, pêvînayîşê telefonî û vengdayîşê Ocalanî yê seba yewîye de ANFyî reyde qisey kerd.

Qiseykerdişê Omer Ocalanî ra beşêk wina yo:

''Vera Birêz Abdullah Ocalanî 21 serrî yo ke tecrîdêko mutlaq yeno kerdene. Birêz Ocalanî 21 serran ra dima heqê xo yê telefonî xebitna. Nêzdîbîyayîşê vera Birêz Ocalanî huqûqî nîyo. 21 serran o ke heqê Birêz Ocalanî yenê xespkerene. No nêno qebulkerdene.

Destpêkê Têkoşînê Şarê Kurdî ra nata Birêz Ocalanî seba yewîta neteweyîye xebate keno û veng dano. Ocalanî seba Kongreya Neteweyî ya Kurdan Serekê PDKyî Mesud Barzanî û ê YNKyî Celal Talabanî rê mektubêk erşawitbi. Abdullah Ocalanî mektubê xo de ardbi ziwan ke yewîya neteweyîye ganî esasê kurdan bibo û ganî hêzê kurdî pêro seba naye xîret bikerê.

Ma vengdayîşê Birêz Ocalanî ra dima tay xebatî kerdî labelê nê xebatî hetê hêzanê mîyanneteweyîyan û neteweyîyan ra ameyî astengkerdene. Birêz Ocalanî pêvînayîşê telefonî de derheqê alozîya Zînî Wertê de bale anceno Protokolê 1982î ser. Birêz Ocalanî îfade kerd ke înan serrra 1982î de Îdrîs Barzanî reyde no protokol îmza kerdbi ke şerê mabênê kurdan biqedo û hînî nêqewimîyo. Birêz Ocalanî seba alozîya Zînî Wertê kerdişê dîyalogan çareser keno. Zînî Wertê de têna kurdî nê hêzê bînî zî mîyanê plananê cîyayan de yê. Zînî Wertê de her roje dezgehî, rêxistinî û şarî eşkerayîyan danê. Ganî selahîyetdarî goreyê naye têbigêrê. Eke seserra 21. de mabênê kurdan de reyna birakujîyêke biqewimîyo, kesêk nêeşkeno hesabê ney bido. Ganî selahîyetdarê Başûrî pê aqilêkê selîmî bifikirê. Kurdî alozîya Zînî Wertê ra fayde nêvînenê û na alozîye seba şaranê Kurdîstanî zerarêko pîl o.

Wexto ke Herêma Başûrê Kurdîstanî waşt ke xoserîya xo îlan bikera Tirkîya welatanê bînan reyde hêrişê kurdan kerd. Pê hemkarîya Tirkîya û Iraqî Kerkûk destê kurdan ra vejîya. Başûrê Kurdîstanî de her ca de kampê leşkerî û kampê MÎTî yê tirkan estê. Nê hezî wazenê Kurdîstan tarî bikerê. Wexto ke kurdî peyê hesabanê binan de gêrenê destkewteyê kurdan zî kewenê tehluke. Tirkîya qet menfaatê kurdan nêwazeno. Xora ganî hetê ekonomîk û bazirganî ra mabênê Herêma Kurdîstan û Tirkîya de pêvînayîşî bibê la heqê PDKyî çin o ke ameyoxê kurdan teslîmê Tirkîya bikerê. Eke no proses wina dewam bikero PDK do bin bikewo.''