Wekîlê HDPyî yê Dêrsimî Alîcan Onluyî vera muracatê Partîya Vatanî yê derheqê Seyîd Rizayî de ekerayîyêk daye. Onluyî vat: Qet hêzê çewî nêvejeno ke Seyîd Rizayî zerrîya ma ra, peykerê ci meydanê ra û nameyê ci kuçeyanê ma ra raqilno.
Partîya Vatanî muracatê Şaredarîya Dêrsimî û Walîtîya Dêrsimî kerd ke wa sembol û peykerê rayberê Xoverdayîşê Dêrsimî Seyîd Rizayî bêrê wedartene. Hetkarê Hemserekan ê Pêroyî yê HDPyî û Wekîlê Dêrsimî Alîcan Onluyî derheqê babete eşkerayîyêk daye.
Onluyî vist vîre ke Seyîd Riza semedê kurdan û elewîyan erjêko pîl o û vat: Erjê ke Seyîd Rizayî tira bawer kerd û seba înan têkoşîn kerd û bedel da ewro ma zî wayîrê nê erjan vejîyenê. Cayê Seyîd Rizayî her çîyî ra ver serê sereyê ma de esto. Qet hêzê çewî nêvejeno ke ey zerrîya ma ra, peykerê ci meydanê ra û nameyê ci kuçeyanê ma ra raqilno. Partîya Vatanî vera şarê Dêrsimî û erjanê ci yê bimbarekan eşkera eşkera hêriş kena. No erjanê elewîyan û kurdan rê hêriş o. Ganî her kes verê nê hêrişî hîsgêr bo û vengê xo berz bikero. No hêriş şexsê elewîyan û kurdan de vera heme erjanê merdimî ye beno. Coka ganî vera na polîtîkaya înkar û îmhayî vengê nêrazîbîyayîşî berz bo.‘‘
Seyîd Riza Hafizaya Ma yo
Hetê bînî ra hemserkanê Partîya Demokratîke ya Şaran (HDP) yê Dêrsimî Nurşate Yeşîle û Îbrahîm Kasûnî zî nêrazîbîyayîş ramot. Hemserekanê ke Ajansê Xeberan ê PÎRHA rê qisey kerd, vat Seyîd Riza hafîzaya ma yo. Tradîsyonê Seyîd Rizayî ameyoxê ma yo. Ma tewirê Partîya Vatanî yê Amed de vera Şêx Seîdî û Dêrsim de vera Seyîd Rizayî qebûl nêkenê.
