Janê vîrusê Korona Dêrsim de vila beno û tay dewê Dêrsimî zî binê karantîna de yê. Merkezê şaristan û qezayan de cuye seke vinderte.

Wekîlê HDPyî yê Dêrsimî Alîşan Onluyî derheqê rewşa vîrusê Korona ya Dêrsimî de eşkerayîyêka nuştekîye daye û vat  vengdayîşê 'Keye de bimane' seba kesanê ke xebitîyenê mumkîn nîyo. Onluyî venga partîyanê sîyasîyan û dezgehanê Dêrsimî da ke 'Paştdayîşê Dêrsimî yê Vera Korona' bêro awankerdene.

Îqtîdarî şaro neçar mergî rê caverdayo

Onluyî eşkerayîya xo de nê çîyî ardî ziwan: ''Heyf ke vîrus Dêrsim de xo mojna ra. Zaf welatî xîret kenê ke şarê xo bi tedbîranê girîngan bipawê. La welatê ma de hema zî karkerî xebitîyenê û seba pawitişê şarî tedbîrê qîmkerdeyî nêameyî girewtene. Welatê ma yo ke nêweşîye her rojê vila bena û hûmara merdeyan zêdîyena de îqtîdarî xebatkar, kedkar û şaro neçar mergî rê caverdayo. Vengdayîşê sey 'Keye de bimane' girîng ê la xeylêk merdimê xizanî estê ke neçare yê ke her roje şorê û bixebitê.  Dêrsim de hetê walîtîye ra tay tedbîrî ameyî eşkerakerdene. La nê tedbîrî şarê xizanî û kedkaranê ke neçare yê ke xebitîyenê nêpawenê. 

Ma pê paştdayîşê yewbînan eşkenê Korona ra xo bixelisnê

Ma têna pê paştdayîşî û têkoşînê hemparî eşkenê na nêweşîye ra bixelisê. Şarê Dêrsimî senî ke wextê vêşnayîşê dewan de, ambargoyê werdî de paştî da yewbînan û ciwîya nê janî de zî do heman paştdayîşî bimojno. Paştdayîşê kulturê ma yo. Reyna nê prosesî de berpirsîyarîyê pîlî yê partîyanê sîyasîyan, rêxistinanê komelê sivîlî, roşnvîran estê.  Ganî Şaredarîya Dêrsimî nê wextî de bedelê awe û kira nêgêra. Ganî karî ra vetiş bêro qedexekerdene. Ganî partîyê sîyasîyî û rêxistinê komelê sivîlî merdimanê hewcedaran rê hetkarî bikerê û seba ke meseleyanê şaristanî çareser bikerê polîtîkayan bivînê. Nê esasî ser o ez venga her kesî dana ke wa pê berpirsîyarîye têbigêro, paştî bido yewbînan û bibo yew.''