Ozmen a Dayike: Ganî tecrîd cade bêro wedaritene
Çalakîyê grevê vêşanîye yê ke seba wedaritişê tecrîdê serê Rayberê Şarê Kurdî Abdullah Ocalanî ameyî destpêkerdene dewam kenê û rewşa weşîye ya girewteyanê Hepisxaneyê Hilwanî her ke şona bena girane.
Girewteyanê Hepisxaneyê Hilwanî ra Alî Erdem, Omer Ozmen Enver Kanmaz û Muhammed Îlgunî 5’ê Çele ra nat grevê vêşanîye de yê û rewşa nê girewteyan roj bi roj bena girane.
Maya Omer Ozmenî Zeynep Ozmene vizêrî laje xo ziyaret kerd û derheqê xoverdayoxanê grevê vêşanîye de malumatî dayî.
Ozmen a dayîke vana îhtîyacîya girewteyan nêna dîyayene û îdare girewteyan rê tedayan keno. Reyna qaso ke Ozmene vana, girewteyî çalakîya xo biqerardarîye dewam kenê û Ozmene wazena ke seba çareserîya problemî ganî tecrîd cade bêro wedaritene. Ozmene wina va: ”Kamî dest ra çi yeno ganî bikero Her kes destê xo bido wîjdanê xo ser û hîna ke zaf kesî nêmerdê, ganî no problem çareser bibo.
