Hemserekê Kongreya Cimatê Demokratîkî (KCD) Berdan Ozturkî grevê vêşanîye yo ke bi vengdayîşê Rayberê Şarê Kurdî Abdullah Ocalanî qedîyayî û peyamo ke Ocalanî bi rayîrê avûkatanê xo şirawit, ANF’yî rê ercnayî.

Hemserekê KCD’yî Ozturkî vat 5’ê Nîsane 2015 ra nata bi tecrîdkerdişê Ocalanî her wareyî de zirar ginayo Tirkîya ro, huqûq raste ra wedarîyayo, demokrasîyo ke kemî estbi zî bi temamî wedarîyayo û ekonomîya Tirkîya bin kewta. Ozturkî vat, “Saya qerardarîya xoverdayoxxan de pêvînayîşê Ocalanî yê bi avûkatan dest pêkerd. No destkewtişêk o. Bi eşkerayîyanê Birêz Ocalanî atmosferêko pozîtîf vejîya werte. Babeta dîyalog, dayîşgirewtiş û çareserîya demokratîke de heman pozîsyonî de vindeno. Na babete de pêşnîyarê xo ardî ziwan û rayapêroyîye ra waşt ke munaqeşeyan bikerê.”

Hemserekê KCD’yî Ozturkî vat şertê ke ma tede yê ramojnenê ke Tirkîya hendî bin ê hawayî nêbena û vat, “Krîzê ekonomîye cuye temamê cimatî rê heremnaye. Azadî û demokrasî raste ra wedarîyayî. Tekane xelasîya nê halî ra pêkerdişo cimatkî, dîyalog û dayîşgirewtiş o. Reya ewilêne nêya ke Birêz Ocalan nê vano. Heta ke problemê Kurdan nêro çareserkerdene tu problem çareser nêbeno. Averşîyayîşê her wareyî bi çareserkerdişê problemê Kurdan beno. Naye ra ganî hêzê demokrasîyî nê heme pêşnîyaran ser o munaqeşeyan bikerê û netîceyêkê biafernê. Metodê 100 serrî nêeşkenê hal bikerê. Xoverdayîşê hemverê nê beno xurt. Bi ‘Planê Binfînayîşî’ yê 4 serran waşt ke kes hendî qalê problemê Kurdan nêkero. Rasta ci, eke înan bala xo bidayêne serê tarîxê Kurdan do bidîyêne ke şarê Kurdî tim xover dayo, çi rey teslîm nêbîyo. Eşkera yo ke bi kiştiş û esaretî problem çareser nêbeno.”

Hemserekê KCD’yî Berdan Ozturkî ard ziwan ke grevê vêşanîye qedîyayo, labelê xoverdayîş do heta qedîyayîşê faşîzmê AKP-MHP’yî dewam bikero. Ozturkî vat, “Serra 2015’î ra nata Kurdistan de huqûqê şerî yo cîya yeno bicaardene. Bi des hezaran embazê ma ameyî tepiştene, merdimê ma binzemînanê awanîyan de ameyî vêşnayene, şehîdê ma ameyî vêşnayene. Qewimîyayîşê ke di hewteyanê peyênan de Riha de virazênê vernîya çiman de yê. Heta ke no mezg nêvurîyo ma do nêeşkenê problemanê xo çareser bikerê. Hemverê nê fehmê bêperwayî, hemverê zihnîyeto ke hemeyê ercanê merdimîye binpay keno do mucadeleyê ma dewam bikero. Qewimîyayîşanê peyênan ramot ke gama merdimî xover bidê eşkenê bi ser bikewê.”