Koordînasyonê PAJKî bi wesîleya Roja Cinîyan a 8ê Adare mesajêk weşana.

Mesaj wina yo:

‘’Ma bi coşê 8ê Adare Rozayan ra heta Clarayan, Sarayan ra heta Asyayan pêro şorişgêranê cinîyan bi rêz û minetî yad kenê.

Têkoşînê ma yê azadîya cinîyan bi têkoşîn, ked û şerê Sakîne Cansiz (Sara) û embazanê ci pîl bi. No rayraşîyayîşê cinîyan ewro Kurdîstan de bîyo global. Nê esasî ser o ma 8ê Adare pêro cinîyan, embazanê xo, embazanê cepheyan û pêro dostan rê fîraz kenê.

Ma bi dîyarîya Manîfestoyê Haştîye û Komelê Demokratîkî yê Rayber Apoyî herikîyenê wisarêkê bînî.

Rayber Apoyî mektuba xo ya seba PAJKî de nuştibi ke awankerdişê nê prosesê neweyî de serkewtiş girêdayeyê cinîyan o. No nêzdîbîyayîşê Rayber Apoyî hêz û kelecan dano ma û dîyar keno ke raştîya cuya azade ya cinîyan metodê cuye yo bingeyîn o. 

Mîmarê têgêrayîşê cinîyan ê Kurdîstanî Rayber Apo yo. Xêrê Rayber Apoyî ra cinîyan bingeyê perspektîfanê azadîya cinîyan de hişmendîya azadîye, îrade û rêxistinîye qezenç kerdî. Ma do nika ra pey sey cinîyan bibê cewabê Vengdayîşê Haştîye û Komelê Demokratîkî têkoşîn bikerê. Ganî pêro terefî zî mesuldarîya nê prosesî bigêrê û erkanê xo bîyarê ca.

Azadîya Rayberîye şerto bingeyî yê averberdişê haştî û cuya hempare yo. Ganî sîstemê esaretî yo 26 serrî hinî biqedo. Pêro cinîyê ke 8ê Adare de herikîyenê waran, ganî a roje bikerê roja azadîya cinîyan û Rayberîye. Serkewtişê nê prosesî bi azadîya Rayber Apoyî beno. Ganî Rayber Apo azad bibo, seba haştî û demokrasîyî îmkananê xebata aktîfe bivisno destî.

Cinîyî ewro zî serkêşê dewrê haştîye û komelê demokratîkî yê. Dewrê komelê demokratîkî dewrê cinîyan o. Ma do bingeyê na hişmendîye de mesuldarîyanê prosesî bîyarê ca û seba azadî, demokrasî û haştîye têkoşîn pîl bikerê.

Seserra 21ine do biba dewrê azadîya cinîyan. JIN, JIYAN, AZADî bîyo sloganê nê dewrî yo bingeyîn. No şîar pêro Kurdîstanî rê vila bîyo û bîyo global. Cinîyî ganî têkoşînê azadîye ra fek vera nêdê. Vera faşîzm û qirkerdişê cinîyan pawitişê cinîyan o tewr pîl rêxistinbîyayîş o.

Ma sey cinîyan her prosesê têkoşînî de rolê serkêşîye kay kenê û serkêşîye kenê. Nika zî serkewtişê dewrê neweyî de sey paradîgmaya cuya azade metodê têkoşînî dîyar o. Ma xo ra bawer ê. 

Ciwanî serkêşê nê prosesî û hêzê afernayîşê ameyoxî yê. Dadîyê ma yê şehîdan û gerîlayan zî wayîrê nê prosesî vejîyenê. Ma venga pêro cinîyanê Tirkîya danê ke nê prosesî de rolê xo bîyarê ca, seba haştîye û demokrasîyî mesuldarîya xo bîyarê ca. Ganî embaz û dostanê ma yê enternasyonalîstan hertim hetê şarê ma de cabigêrê. Nê prosesî de bingeyê Jin, Jiyan, Azadî de ma têkoşînê hemparî bikerê û têkoşînê cuya azade pîya îdare bikerê.

Nê esasî ser o ma 8ê Adare pêşwazî kenê. Ma bi bawerîya pêvînayîşê azadî yê Rayberîye pêro cinîyan û şarê xo selam kenê. Ancî ma 8ê Adare fîraz kenê.

Bijî Rêber Apo!

Bijî 8’ê Adarê!”