Parlamentoyê Başûrê Kurdistanî seba tawirê vera hêrişanê îşxalkarîye yê dewleta Tirkî yê vera Vakur û Rojakewtena Sûrîye bîgêro ame pêser.Kombîyayîş de grûbanê PDK û YNK’yî û grûbanê partîyanê bînan hêrişê îşxalê dewleta Tirkî şermezar kerdî û veng da heme Kurdan ke wa yew bî.

Roniştişê parlamentoyî de  qerarê ke  12 madayan ra ameyî girewtene wina yê:

"1. Parlamentoyê Kurdistanî paştî dano çareserîyêka bi haştîye.

2. Parlamentoyê Kurdistanî hêriş û îşxal şermezar keno û vano ke ganî gan û malê şarê sivîlî bêrê pawitene.

3. Parlamentoyê Kurdistanî veng dano hêzanê mîyanneteweyî ke wa semedê haştîye çîyêk bikerê.

4. Sey hukmatê herême ganî pîya bi dezgehanê mîyanneteweyî semedê êyê ke şerî ra remayî ameyî herêma ma înan rê hetkarîye bêre kerdene.

5. Hukmatê herême û serekê herême ganî pîya bi Iraqî semedê çareserîye tê bigerê û hêzanê mîyanneteweyî bifînê mîyanê têgêrayîşî.

6. Hukmato merkezî ra ma wazenê ke  semedê hetkarîya înan ke bar kerd ameyî tîya, paştî bido hukmatê herême.

7. Heme hêzê herêma ma wa semedê Rojawanî bi hîsgêrîye tê bigêrê û semedê vernîgirewtişê hêriş û talanî xîret bikerê.

8. Parlamentoyê Kurdistanî do semedê hetkarîya Rojawanî kampanyayêka neteweyeyîye  bido destpêkerdene.

9. Parlamentoyê Kurdistanî nêwazeno ke qirkerdiş û qetlîamê ke Efrîn de bîyî Serêkanîyê, Girê Spî û herêmanê bînan ê Rojawanî de bibê.

 10. Heqê Sûrîye û şarê Kurdî esto ke goreyê qanûnan platformanê mîyanneteweyî de problemanê xo çareser bikerê.

11. Parlamentoyê Kurdistanî parîyanê sîyasî û hetan ê Rojawanî ra wazeno ke wa pênêkerdişanê xo hetêk de ronê û pelêko newe abikerê.

12. Parlamentoyê Kurdistanî bala hêzanê mîyanneteweyî anceno ke  peyserancîyayîşê Amerîka  ra dima despêkerdişê hêrişan DAÎŞ’î newe ra ganî keno.‘‘