KCD,TJA, DBP, HDP, Meclîsê Dayîkanê Haştîye, Komeleya 70yan, MEBYA-DER), MED TUHAD-FED, MED-DER,GOÇ-DERî vera hêrişê îşxalî yê AKP-PDKyî yê vera Başûrê Kurdîstanî eşkerayîya hempare daye. Eşkerayîya ke verê banê Rêxistina DBPyî ya Amedî de ameye dayene Hemsereka Pêroyî ya DBPyî Salîha Aydeniz, Wekîla HDPyî Feleknas Uca û xeylêk temsîlkarê rêxistinanê komelê sîvîlî tewrê ci bîyî.

Feleknas Uca bale ante ser ke badê pêvînayîşê Mesrur Barzanî û Tayyip Erdoganî hêriş ameyo kerdene û vat: ''Bi hewayêkê hemwextî artêşa Iraqî zî hêrişê Şingalî kerd. Erfatê roşanê Çarşeme Sorî de nê hêrişî tesaduf nîyê. Reyna vera Şingalî hêrişê hîrayî yenê amadekerdene. Çîyo ke DAÎŞ 3ê tebaxe de nêberd sere Tirkîya, Iraq û PDK wazenê bikerê. Ma reyna nê hêrişan şermezar kenê.''

Salîha Aydeniz zî operasyon sey dişmenîya Tirkîya ya vera kurdan hesibna û vat: ''Ma zanê ke nê hêrişî dewamê polîtîkaya dişmenîya yê hezar serran a vera kurdan a. Nê îqtîdarê ke qet xizmetî şaran nêkerd pê şerî wazeno payra bimano. Dişmenîya vera kurdan, polîtîkayê şerî ke çirey nêqedîyenê, tecrîd û polîtîkayê qeyûmî Tirkîya rê danê vînîkerdene. Coka ganî heme hetan ra vera nê şerî veng bêro berzkerdene. No hêriş hêrişê îşxalê Başûrê Kurdîstanî yo, hêrişê çînkerdişê destkewteyanê kurdan o. Şarê Başûrê Kurdîstanî ganî wayîrê destkewteyanê xo vejîyo. Seba ke statuyê xo vînî mekero ganî vera nê şerî vejîyo. Ganî ma pêro pîya naye rê vajê ney. Ma sey tim reyna şerî rê vanê ney. Ma do semedê pawitişê destkewteyanê kurdan têkoşînê yewîye bidomnê.  PDK goreyê menfeatê xo polîtîkaya Tirkîya û welatanê herême têgêreno.  Şarê kurdî do verê tarîxî de hesabê naye biperso. Ewro pawitişê statuyê Başûrê Kurdîstanî berpirsîyarîya heme kurdan û şaranê Rojhilatê Mîyanênî ya. No tewirê keyeyê Barzanî û PDKyî kurdan rê dano vînîkerdene. Na xete xeta kurdîstanî nîya.''

Dima ra metno hempar ame wendene û nê ameyî vatene: ''Îqtîdarê AKP-MHPYî bado ke masaya muzakereyî 7ê hazîrene de qeldaye vera kurdan dest pê şerê tewr giranî kerd. Herinda çareserkerdişê meselaya kurdî polîtîkayê şerî fînayî dewre. Prosesê ke pê tecrîdê Îmraliyî dest pêkerd pê îşxalê Efrîn, Serekanîyê û Girê Sipî, îşkence û qirkerdişê zîndanan, operasyonanê  vera sîyasetmedar û şarê kurdî, dewaya qefilnayîşî ya HDPyî, tepiştiş, îşkence û qirkerdişan bêmabên dewam kerd. Rixmê nê heme caardişan kurdan çok nêda û xoverdayîşê xo pîlêr kerd. Newroza 2022î de bi mîlyonan vejîyayî waran tewirê xo zelal ramojna.  Badê Newroze îqtîdarî hêrişê xo zafêr kerdî. Bi hezaran hemwelatîyê ma bi operasyonanê çokdayîşî ameyî destbendkerdene û tepiştene. La nê caardişî sey ewro do siba zî netîce nêgêrê. Ma hêrişê artêşa Iraqî ya vera Şingalî zî şermezar kenê û vanê ma tim kişta xoverdayîşê şarê Şingalî de yê. Ma veng danê heme hetanê kurdan ke wa vera PDKyî û hêzê ke rolê înan şer de esto wa tewir bîgêrê. Reyna ma veng danê hetanê şiroşgêr û demokratan ê Tirkîya wa vera nê şerî bêveng memanê. Ganî şarê Kurdîstan û Tirkîya ver nê şerî wirzê payan ser.''

Maya Haştîye Havva Kiran zî veng da keyeyê Barzanîyî û vat: ''Şima bi nameyê kurdan kurdan qetil kenê. Dişmenîtîya tewr pîle şima kurdan rê kenê. Qicê kurdan semedê azadîya şarê xo  têkoşîn kenê, şima înan ser o bombayan varnenê. Destê şima gonîya qicanê ma de mendî. Sey dayîkan destê ma pêsîrê şima de yê.''