Adil domananê kuçeyanê eşqî ra yew bi. Adil warê egîdan ra warê Reşîr Serdar, Bargiran Erkendî, Herekol Memîra ra şaristanê Sêrtî yê herêma Botanî ra bi.

Botan qîblegehê eşiqan, dergehê cinîyan, fîşkeê cuye bi...Adil zî keyeyanê welatperweran ê Botanî ra ameyêne. Her çiqas înan verê xo dabi xurbet zî Adil raştîya şar û keyeyê xo ra dûrî nêkewt û kokê xo ser zîl bi.

Serra 2012î de Adil hînî beno Partîzan û verê xo dano welatê koyan. Partîzan perwerdeyanê bingeyînan ra dima 2013 de verê xo dano Zagrosan. Zagrosîhalîna gerîlayan a. Sirê Zagrosan zî heskerdiş o. Eke ti tira hes bikerî Zagrosî to derman kenê. Embaz Partîzan zî no qayde beno embazê Zagrosan.

Serra 2015î de menga temmuze de prosesê bêaktîfbîyayîşî beno xirab û mabênê têgêrayîşê ma û dewleta tirke ya îşxalkere de şer dest pêkeno. Dewleta tirke vera gerîlayan pêro teknîkanê giranan xebitnena. Bi desan reyî, bi desan teyarayanê şerî dana Kurdîstanî ro. Embaz Partîzan o çax bi rolêkê aktîfî têgêreno, dişmenî rê beno ters û embazanê xo rê beno tirs. O xebatanê zehmetan de ca gêno û tempoyê xo ra qetî fek vera nêdano. Xeylêk wextî o Çarçella de maneno û dima derbazê Cepheyê Cîloyî beno. Partîzan hînî Zagrosan de bîyo yew, bîyo Zagrosêk...Zerrî de, rih de, mezg de ey Zagrosan ra hes kerdêne. Eşqê ey raştikên bi, eşqê Zagrosan zî wina bi ke wexto ke Zagrosî hes bikerê to gênê kişta xo û nêdanê çewî. Zagrosî eşiqanê xo gênê verarê xo û boye kenê.

Koyê Zagrosî embaz Partîzanî 29ê hezîrana 2020î de gêbê verarê xo û serê singê xo de kenê hewn.