Çimdarê sîyasîyî Mihemed Nesredînî armancê zîyaretî yê Tirkîya, Başûrî ra peydakerdişê petrol-gazî yê Tirkîya û hêrişê dewleta tirke ya îşxalkere ANFyî rê ercnayî. 

Nesredînî vist vîrî ke Serekwezîrê Herêma Kurdîstanî Mesrûr Barzanîyî Tirkîya zîyaret kerda û no zîyaret di babetan ser o yeno nîqaşkerdene. Nesredînî vat: ''Nê babetan ra aya yewine meseleya gazî ya, aya diyîne zî meseleya erdê Kurdîstanî ya. Nê wird babetî zî derheqê asayîşê Kurdîstanî de yê. Şerm o ke destkewteyê Kurdîstanî dişmenî rê yenê pêşkêşkerdene û dişmenî de hemkarîye yena kerdene. Pawitişê destkewteyanê Kurdîstanî erko exlaqî yê pêro kurdan o. Kesê ke kurdî înan sey rayber vînenê, ganî hemkarîya dişmenî ra dûrî vinderê. Ma eşkenê pê awankerdişê yewîya neteweyîye pêro destkewteyanê Kurdîstanî bipawê.

Nê kerdişî tewr zaf zerar bidê PDKyî. Ewro kesê ke hetê artêşa tirke de ca gênê do zerarêkê pîlî bivînê, Kurdîstan de hêzê xo vînî bikerê. Eke hêrişê vera Kurdîstanî dewam bikerê destkewteyê kurdan do nêmanê. Nê hêrişan ra tek rayîrê felatî awankerdişê yewîya neteweyîye û dişmenî ra dûrîvindertiş o.''

Nesredînî dîyar kerd ke binê nameyê ekonomîya xosere û rotişê petrolî yê xoserî de dişmenê kurdan yenê bihêzkerdene û derde dîyena dewaya kurdan ro. Nesredînî vat: ''Dişmen petrol û gazê Kurdîstanî ra îstîfade keno û seba ke erdê Kurdîstanî îşxal bikero çek û teqaberan şuxilneno. Gaz û petrolê Kurdîstanî seba ke destkewteyê kurdan bêrê pawitene wa bêrê şuxilîyenê.''