Dewleta tirke ya bi îdareyê AKP-MHP, Ergenekonî serra 2017î de seba îşxalê Başûrê Kurdîstanî dest pê hêrişan kerd, nika Heftanîn de hêrişanê xo dewam kena û seba hêrişê vera Metîna zî amadekarîye kena. Aseno ke PDK zî bi heman hawayî madekarîye keno. PDKyo ke hêrişanê vera Heftanînî ra dima hêzê xo zaf waran de ca kerdî, amadekarîya leşkerîye reyde operasyonê gemarinî û porpagandaya reşî keno  û bi nê hawayî seba hêrişan zemînêk awan keno.

Goreyê zanayîşanê ke ANFyî çimeyanê herême ra girewtî, hêrişê dewleta tirke yê vera Heftanînî reyde Hêzanê Muhafizanê Sînorî yê Iraqî û hêzanê PDKyî zî başûrê Heftanînî de dest pê cabîyayîşê Kêre kerd. Bi nê hawayî PDK waranê gerîlayan keno teng û têgêrayîşê gerîlayan asteng keno. Wexto ke dewleta tirke dest pê vêşnayîşê dewan kerd nê hêzan xo apey ant û têna seyr kerd.

Nê prosesî de waranê Banka (Serê Metîna), Erizê û Bamernê û dewa Şirtê de hêzê Zerevanî yê PDKyî ameyî cakerdene. Hêzê Zerevanî temmuza 2020î de dewanê Banka û Erizê de ameyî cakerdene.Heta dîya zanayene ke hêzê Zerevanî pabesteyê Ezîz Weysî yê û 6 mengan goreyê şert û mercanê koyan ameyî perwerdekerdene.

Hêzê Lîwa 4 ê PDKyî zî tebaxa 2020î de herêma Metîna de Girê Ortê de (Gavnerkê-Kanîmasî),  Girê Barê de dewa Sefara de û noqtayêka dewa Cidîdkê de ameyî cakerdene. Eşkera yo ke bi nê hawayî ame armanckerdene ke warê gerîlayan yewbînan ra cîya bibê. Nika zî bire dîyaye ke nê hêzî xo apey biancê û nê waran de têna hêzê PDKyî ca bibê.

Reyba rojanê peyênan de heyetêkê PDKyî herêmanê Heftanîn û Metîna de kombîyayîşêk kerd û herême keşf kerde. Heyet nê kesî ca gênê; Berpirsîyarê Hêzanê PDKyî yê Dihokî Şêx Elo, Serbest Lezgîn, Berpirsîyarê Îstîxbarê Leşkerî yê PDKyî Brûsk û Fermandarê Hêzanê Zerevanî Ezîz Weysî. Heyetê 15ê teşrîna verêne de Behdînan de kombîyayîşê xo de vera Têgêrayîşê Azadîye yê Kurdîstanî tay birî dayî. Dima pêşmergeyan rê ame vatene ke 'Gerîlayî do hêrişê şima bikerê, amade bibê.' Leşkerê Gulan û çekdarê Roje yê ke pabesteyê Mesrûr Barzanî yê, erşawîyayî herêmanê gerîlayan.

Dîyeno ke Berpirsîyarê Hêzanê PDKyî yê Dihokî Şêx Elo mabênê 25-27ê teşrîna verêne de ame Zaxo û Batûfa, 4 noqtaya neweyî eşkera kerdî ke hêzê PDKyî do tede ca bibê. Goreyê zanayîşan Heftanîn û Metîna de nê hêzî do bêrê zêdînayene.

PDKyî rojanê peyênan de 10 kurdî destbend kerdî. Îdîa kerd ke nê kesan amadekarîya çalakîye kerdêne û kerd ke operasyon û provakasyonê xo meşrû bikero. Bi nê hawayî PDK hemkarîya xo ya bi dewleta tirke zî mîyan keno û rayaumûmîye xapîneno.