Goreyê xebera Rojnewsî Serekê Cepheyê Tirkmenan ê Iraqî  (ITC) yo verên Erşed Salihiyî eşkera xo de ya ke daye medyaya Iraqî da eşnawitene ke înan PDK û hêzanê ereban reyde derheqê îdareyê cayîyî yê Kurkukî pêkerdiş kerdo.

Erşed Salihî eşkerayîya xo de nê vatî: ''Mabênê hetan û rayberanê sîyasîyan de pêvînayîşî dewam kenê. Cehdkerdişê pêkerdişî yê Serekê Iraqî ser kewt.''

Erşed Salihiyî ard ziwan ke hema blokê sîyasîyan pênêkerdo û vat: ''Ez pê bawer a ke mîyanê çend rojan de pêkerdiş beno. Çunke wext kilm o. Rewşa nikayene ya Kerkukî çewî rê feyde nêkena.''

Meclîsê Kerkukî de 16 kursîyî est ê ke înan ra 7 hebî yê hetanê kurdan ê. PDK nê demî de ke kurdî semedê yewîya neteweyîye xîret kenê, semedê wezîfeyê Walîtîya Kerkukî bi kurdan nê, Cepheyê Tirkmenan reyde pêkerd ke bi talîmatê Hakan Fidanî têgêreno.