Hêrişanê îşxalî yê dewleta tirke yê vera Başûrê Kurdîstanî ra bi hezaran kesî neçare mendî ke dewanê xo ra koç bikerê. Dergelê zî nê dewan ra yew a ke hetê PDKyî û dewleta tirke ra ameya talankerdene û şarê ci koç kerdo.
Artêşa tirke ya îşxalkere Başûr de seba îşxal û talanî ancî hêrşê sivîlan kerd. Dîmenê dewa Dergelê ya Metîna mojnenê ke keye û baxçeyê dewijan senî ameyê talankerdene.
Artêşa îşxalkere 23yê nîsana 20221î ra nata bi armancê îşxalî hêrişê herêma Metîna kena. Nê operasyonê vakurê herême 16ê hezîrana emsere de hîra bîyî û derbazê başûrê herême bîyî. Bi taybetî Metîna, Golka, Şêlazê, Dergelê û Bazê bîyî hedefê hêrişan. Roja verêne ra nata îşxalkerî hêrişê dewan kenê û dewijî zî neçare manenê ke herême ra koç bikerê.
Çimeyanê herêmîyan pare kerd ke hêrişê giranî vera keyeyanê dewijanê Dergelê ameyê kerdene.
Artêşa tirke û PDK xîret kenê ke dewan veng bikerê la dewijî her firsend de agêrenê ca û wareyanê xo. Eşkera bi ke artêşa îşxalkere bi teyarayanê şerî hêrişê dewijan kerd û dima zî mal û malzemeyê dewijan diznayî. No dîmenan de zî aseno.
Dewijan dîyar kerd ke dewleta tirke bi rayîrê PDKyî nînan ra waşto ke wa ê dewe biteriknê. La wexto ke dewijî agêrayê înan dî ke her çi sey verî nîyo. Coka dewijî PDKyî nê talanî ra mesuldar vînenê.
Balkêş o verê cû dewa Dergelê de xeylê kesî pêşmerge bîyê û înan herême de şer kerdo. La PDKyî ra ewro gonî û keda bi seyan welatperweran yenê rotene.
