Pencêwînîyî vat ke eke Başûrê Kurdîstanî de mabênê kurdan de şerêk dest pêbikero no şer têna mabênê PDK û PKKyî de nêmaneno, pêro Kurdîstanî ra vila beno. Pencêwînîyî îfade kerd ke Tirkîya kena ke mabênê kurdan de şer veja.
Mihemed Emîn Pêncewînîyî bi eşkerayîyêke pare kerd ke çend rojan ra nata mîyanê kurdan de qala şerê zereyî yena kerdene û da zanayene ke eke mabênê kurdan de şerêk dest pêbikero no şer têna mabênê PDK û PKKyî de nêmaneno, pêro Kurdîstanî ra vila beno.
Mihemed Emîn Pêncewînîyî eşkerayîya Mudirîya Asayîşê Başûrê Kurdîstanî viste vîrî û da zanayene ke hem YNKyî hem zî PDKyî senaryoyê Encûmenê Asayîşî tesdîq nêkerd.
Eşkerayîya Mihemed Emîn Pêncewînîyî wina ya:
''Ez venga pêro roşnvîr, hunermend, sîyasetmedaran, hêzanê sîyasîyan ê Başûrê Kurdîstanî, pêro welatperwer û kurdperweran dana.
Rojanê peyênan de zingilê tehlukeyê şerê kurdan ceneno. Dima ke Endûmenîya Asayîşê Herêma Kurdîstanî pare kerd ke 3 kesê ke amadekarîya hêrişêkê terorî kerdêne ameyî destbendkerdene PKK sûcdar kerd. YNKyî zî eşkera kerd ke xebera encûmenanê înan pê serebûtî çin a. Coka înan serebût tesdîq nêkerd.
PKKyî zî bi rayîrê Murad Karayilanî na sûcdarîye qebul nêkerde û Karayilanî vat ke ê seba dîyalogan amade yê. No nêzdîbîyayîşêko pozîtîf o.
Eke mabênê kurdan de şerêk dest pêbikero no şer têna mabênê PDK û PKKyî de nêmaneno, pêro Kurdîstanî ra vila beno. Bi nê hawayî zî prestîjê kurdan do qels bibo û dewaya kurdan apey beno. No zî do bibo seneyê kurdan de tîrê dişmenî.
Mi serra 1992î de şerê PKK û Cepheyê Kurdîstanî de mabênçîtîye kerde. Coka ez rîyê gemarinî yê nê şerî zanena. Nê pêro seba qelskerdiş û çinkerdişê dewaya kurdan o.
Birêz Serekê Partîya Demokrate ya Kurdîstanî Kek Mesûd Barzanî, birêz Serekê Herêma Kurdistanî kek Nêçîrvan Barzanî, birêz Serekwezîr kek Mesrûr Barzanî, birêz Sereka Parlemento Rêwas Fayiq, birêz kek Kosret, birêz Şêx Lahûr, kek Bafil Talibanî, kek Qubad Talibanî, embazê hêjayî birêz Cemîl Bayik, Murat Karayilan û embaz Sabrî Ok; ez şima ra wazena ke nê planê dişmenî çin bikerê! Eke PKK û PDK pêbikerê dewaya kurdan do aver şora û nêzdîyê hedefê xo biba. Eke nê wird hêzî bêrê têvera û şer bikerê hêzê bînî yê kurdan zî do pûç bibê û dewaya kurdan do biqeda. Ganî ma pêro seba no boykotkerdişê dewaya kurdan çin bibo xîret bikerê.''
