Partîya Cuya Azade ya Kurdistanî (PJAK) bi eşkerayîyêka nûştekîye şehîdê menga Gulane bi vîr ardî. Eşkerayîye de ame vatene ke menga Gulane menga şaranê ke ameyê eciqnayene ya û no vajîya, “Ma şexsê serkêşanê dewaya azadîye ra Ferzad Kemanger, Ferhad Wekîlî Elî Hederîyan, Medî Îslamîyan û Şîrîn Elemhûlîyî de heme şehîdanê menga Gulane bi vîr anê. Ma do xoverdayîş û mucadeleyo ke şehîdan resnayo dereceya tewr berze biresnê serkewtişî û heta helmê xo yê peyênî rayîrê înan de şirê. Ma nê bingeyî de îdamanê rejîmê Îranî zî bi şidet şermezar kenê.

Dewleta Îranî ya îşxalkare 9’ê Gulan a 2010’î de bi îdamkerdişê Ferzad Kemanger, Şîrîn Elemhûlî û embazanê înan waşt ke metodanê ke verî Kurdistan de bica ardê reyna tekrar bikerê. Înan waşt ke bin ê îdaman sazîyanê Kurd û demokratîkan ê ke Îran de yê bitersnê.”

Tu Dîktatorîyêk Nêeşkaye Vernîya Têgêrayîşê Azadîye Bigêro

Dewamê eşkerayîye de nê vajîyayî: “Şehîdanê 9’ê Gulane îspat kerd ke zext, îşkence û îdam nêeşkenê vernîya şerwananê azadîye bigêrê. Senî Mezlûman sîyasetê teslîmîyetî Zîndanê Amedî de veng a vet, ewro zî şexsê Leyla Guvene de do no siyaset bin bikewo.

Hetêk ra grevê vêşanîye yo ke bi şîyarê ‘Ma tecrîdî bişiknê, faşîzmî birijnê û Kurdistanî azad bikerê’ hetê hezaran tepişteyan ra yeno kerdene, hetêna ra 15 tepişteyan 30’ê Nîsane de dest bi rojeyê mergî kerd. Na çalakîye û xoverdayîşî Zîndanê Evînî zî gane kerd û kulturê xoverdayîşî Rojakewtene de zî vila bi.

Rejîmo kiştox ê Îranî hemverê şaran de bicaardişanê antîdemokratîkan domneno. Heta ewro tu dîktator nêeşka vernîya Têgêrayîşê Azadîye bigêro û nêeşka hemverê hêzê şarî de şiro sere. Xoverdayîş û mucadeleyê şarê ma do peynîya rejîmê Îranî bîyaro û cuya demokratîk û seypêye awan bikero. Nê bingeyan ser o ma reyna şehîdanê 9’ê Gulane bi vîr anê, veng danê şarê xo û rayapêroyîye ke hemverê îdamanê rejîmê Îranî de bêveng memanê.”