Komîteya Rayberdişî ya PKKyî derheqê 1ê Gulane Roşanê Karkeran de eşkerayîyêke weşanaye.

Eşkerayîya PKKyî wina ya:

''Kedkar, ciwan û cinîyê dinya emser 1ê Gulane pê têkoşînêkê xurtêrî yê vera hêriş û gefanê sermayeya globale pêşwazî kenê. Nê esasî ser o ma 1ê Gulana karker, bindest, cinî û ciwanan fîraz kenê ke têkoşînê demokrasî, azadî û sosyalîsmî anê ca. Têkoşînê înan ê vera kolonyalîzm û zordarîye de ma înan rê serkewtiş wazenê.

Têkoşînê karkeran de zaf kesî şehîd bîyî. Nê esasî ser o ma şehîdanê çêran ê Chicago, Taksîm, gerîlayê şehîdî Ramazan Kaplan û pêro şehîdanê 1ê Gulane bi rêzdarî yad kenê û soz danê ke ma do armancê înan bîyarê ca.

Hêzê hegemonîk û kapîtalîstî yê globalî û dîktatorê netewe-dewletan rayberîya îqtîdarê faşîstî yê AKP-MHPyî de vera şarê Kurdîstanî û ê Rojhelatê Mîyanênî teda, zulm û qirkerdişan kenê. Sîstemo kapîtalîst û faşîst paştê xo dano vîrusê Korona û xîret keno ke derbe bido têkoşîn û rayraşîyayîşê azadîye yê şar û cinîyanê kurdan. Coka ganî cinîyî, kedkarî, bindestî nê hêrişan raşt fam bikerê û vera nê hêrişan têkoşînê demokratîkî û şorişgêrî pê 1ê Gulane bikerê.

Sere de Rojhelatê Mîyanênî de eke dinya de şer, rijîyayîş, qirkerdiş, vêşanîye, xizanîye, bêkarî, krîz, nêweşîye, jan, gefê vera xoza estê semedê înan têna sîstemê modernîteya kapîtalîste ya dewletperest-îqtîdarpereste ya serdestîya camêrdan ê.

Naye ra her roje tewr tay vîst ezar kesî vêşanîye ra û nêweşî, janê sîstemê kapîtalîstî ra mirenî û  bi seyan merdimî zî xo kişenê. Bi se hezaran merdimî koç kenê, mehkûmê koletîye benê. Bi hezaran cinîyî hetê hîşmendîya serdestîya camêrdan ra kişîyenê. 

Yewdestîya globale pê polîtîka û vatişanê xo vano ke vîrusê Korona çi dewlemend çi xizan her kesî rê tesîr keno. Yewdestîya globale bi nê hawayî xîret kena ke merdimîye bêçalakî û bêtêkoşîn biverda ûteslîm bigêra. Hêzê serdestî qayîl ê ke komel bimiro. Coka erk û wezîfe yo ke pê paradîgmaya demokratîke, ekolojîke, azadîpawitoxîya cinîyan vera hêriş û sîstemê kapîtalîstî bêro xoverdayene û têkoşînê demokrasî û têdûştîye yê azadîye û cîyatîye bêro caardene, cuyêka newîye bêra awankerdene.

Faşîzmê AKP-MHPyî pê cergan û hemkaranê xo hêrişê Vakur, Rojawan, Başûrê Kurdîstanî, Lîbya û Sûrîye keno û wazeno ke pê nê hêrişan Têkoşînê Azadîye yê Kurdîstanî, têgêrayîşê demokratîk-şorişgêrî yê Tirkîya û Rojhelatê Kurdîstanî tasfîye bikero. Coka girîng o ke têkoşînê demokrasî û azadîye yê Rayber Apoyî, Hakî Karer û Kemal Pîrî bêro pîlkerdene. 

Sîstemê tecrîd û îşkenceyî yê İmraliyî kelayeka tewr xurtkerde ya Tirkîya ya. Sîstemê tecrîd û îşkenceyî yê Îmraliyî yo ke vera Rayber Apoyî yeno caardene, pê vîrusê Korona vurîya sîstemê tecrîd û îşkenceyî yê vera cinîyan, kedkaran, şaran û bindestan. Dewleta tirke pêro komel kerd zereyê keyeyê ci, Tirkîya û Kurdîstan vurna zîndanêk û bi nê hawayî wazena ke her ca de serdestîya xo awan bikera. Labelê nêzanena ke şar, kedkar û bindestî zanenê ke ters faydeyê hêzanê serdestan nêkeno.

Eke ma xoverdayîşê bêhempa yê Rayber Apoyî yê vera Îmraliyî hol fam bikerê, tewrê xoverdayîşî bibê û sîyaset û hîşmendîya faşîste ya ke wazena komel teslîm bigêra çin bikerê; hînî ma do bieşkê armancê xo yê seba azadîya Kurdîstanî û demokratîkbîyayîşê Tirkîya û Rojhelatê Mîyanênî bîyarê ca.

Hêzê ma yê gerîlayî seba nê armancî vera faşîzmê AKP-MHPyî têkoşîn kenê, qesas gênê û derbanê pîlan danê piro. Şarê ma, hêzê demokrasî yê Tirkîya û Rojhelatê Mîyanênî vera hêrişan xo ver danê û pê qerardarîye nê armancî anê ca. 1ê Gulane seba girewtişê qesasî û berzkerdişê rayîrşîyayîşê azadîye û netîcegirewtiş yeno manaya prosesêkê neweyî yê têkoşînî.

Nê esasî ser o ma şehîdanê 1ê Gulane reyna yad kenê, 1ê Gulana Rayber Apoyî, embazan, şarê ma yê welatperwerî û kedkaranê dinya bi coşî fîraz kenê. Ma venga şarê xo û hêzanê demokratîkan-şorişgêran danê ke alaya 1ê Gulane berzêr bikerê, bi hawayêkê aktîfî neşdarê fîrazşayîyanê 1ê Gulane bibê, vera tecrîd, komplo û tasfîye bibê yew, her ca bikerê cayê paştdayîş û yewîye.''