Komîteya Rayberdişî ya PKK’yî bi wesîleya serrgêra 15’ Tebaxe eşkerayîyêka nuştekîye daye û nê pare kerdî:

Hemleya Gerîlayê Şorişgêrî yê 15’ê Tebax a ke mîladê Kurdan a kewena serr a xo ya 36’ine. Şerê gerîlayî yo ke semedê azadîya Kurdistanî, xeta azadîye ya Rayber Abdullah Ocalanî û komûtaya Fermandarê Bêmergî yê Egîtî ( Mahsûm Korkmaz) de  Erûh û Şemzînan de dest pêkerd, 35 serrî yo bêmabên dewam keno. Xoverdayîşê tarîxîyî şarê Kurdî kerd endamêko bianor ê keyeyê merdimîya azadîye. Na çarçewe de sere de Raber Apo ma roşanê heme hemrayan û şarê xo pîroz kenê. Şexsê Fermandar Agît de heme şehîdanê xo yad kenê.

Estbîyayîşê Kurdan Xeyrê Xoverdayîşê Gerîlayî Ame Zanayene

Hemleya 15’ê Tebaxe rixmê heme astenkerdişan  û hêrişan heta ewro bi serkewtişî ameye. Xoverdayîşê azadîye yê 35 serran bedelê girdî dayî, dejê giran antî û tewr tay 50 hezar şehîd dayî.  La rixmê hêrişanê dewleta Tirkî ya qirkerdoxî  şar û Têgêrayîşê Azadîye yê Kurdî her tim bi bîhêz û serkewte. Ma zaf hol zanê ke xeyrê nê mucadeleyî ewro Kurdan zaf çî fînayî dest. Nika her kes vîneno û qebûl keno ke şarê Kurdî zanayîş û ruhê azadîye ,fedakarîye, hêzê çalakî û rêxistine, bawerîya serkewtişî û îradeyê cuya azade xoverdayîşê tarîxî yê gerîla û hemleya 15’ê Tebaxe ra girewt. Şorişê ganîbîyayîşê neteweyîyî yê Vakurî, statûyê Başûrî û Şorişê Rojawanî xeyrê nê mucadeleyî bîyî. Ware û nasnameyê Kurdan xeyrê xoverdayîşê gerîlayî ame zaneyene.

Serhad ra Heta Xakurkê Gerîlayî Derbeyanê Girdan Danê Îşxalkaran ro

Dekewtişê serr a 36’ine de vera faşîzmê AKP-MHP’yî ma sey gerîla û şarî şerê şorişgêrî yê şarî yo topyekûnî her ware de rayra benê. Gerîlayo ke bi ruhê 15’ê Tebaxê bingehê paradîgmaya neweye de xo xeta gerîlayê Apoyî de newe ra aferna,  Serhad ra heta Xakurkê, Dêrsim ra heta Mêrdînî her cayê Kurdistanî de derbeyanê girdan dano îşxalkaran ro. Bi na wesîle ma xoverdayîşê tarîxîyî yê 35 serran ê  gerîlayanê xo yê qehremaman pîroz kenê û dewamê serkewtişê înan wazenê. Ma şexsê şehîdê serrgêra 15’ê Tebaxe,  mîlîtanê PKK û PAJK’î û fermandara bêmerge ya HPG û YJA Starî Şevîn Bîngole de heme şehîdanê xo bi vîr anê. Ma reyna vanê ke xeta komûtaya Apoyî ya ke Fermandar Egîtî ra heta Fermandare Şevîne derg bîye, ma do miheqeq ser bikewo. Ma bawer kenê ke semedê vîrardişê Şehîd Helmet û Şehîde Şevîne do mucadeleyêkê qesasî yo bihêz û  şorişgêr bero domnayene û hîna gird bêro serkewtene. Ma reyna vanê ke hemê hêrişê vera ma do bi xoverdayîşê gerîla û şarî cewabêko tewr gird bîgêrê. Na çerçewe de ma veng danê ke wa Roşanê Xoverdayîş û Ganîbîyayîşî yê 15’ê Tebaxe heme wareyan de bicoş û kîtlekî bêro pîrozkerdene.’’