Komîteya Merkezî ya PKKyî bi wesîleya roşanê Newroze eşkerayîye daye û vat: ''Semedê piştişê birînanê erdlerzî û vîjnayîş de binfînayîşê îqtîdarê AKP-MHPyî gerek bi ruhê seferberîye bêro xebitîyayene.''

Eşkerayîya Komîteya Merkezî ya PKKyî ra tay nuqtayî wina yê:

''Newroze semedê heme şaranê ke vera zilmî serewederanê, xover danê û bimbarek kenê, rojêka newî, newerabîyayîş, destpêkerdişo newe, yewîye, roşanê xoverdayîş û azadîye yo. Newroza ke sembolê xoverdayîş û azadîye ya bi hezar serran o hetê kurd, ereb, tirk, fars û şaranê bînan ra yena bimbarekerdene. Dewleta tirke ya qirkere çend bikero ke Newroze eslê ci ra raqilno zî ser nêkewte. 

Na zî raştîyêka ke Newroze reya verêne bi PKKyî resaye manaya xo ya raşte û sey roja xoverdayîş û serewedaritişî ameye pênaskerdene. PKK eynî wextî de partîyêka Newroz a. Hemra Mazlûm Doganî Zîndanê Amedî de adirê Newroze fîna ta. No zî mojneno ke PKK û Newroze senî pabesteyê yewbînan ê. Xora yeno zanayene ke dima ra bi  adirê Newroze yê Zekîye, Rahşane, Bêrîvane û Ronahîyan 90yan senî Kurdîstan de serhildanê biheybetî yê şarî bîyî,

Tirkîya kewta prosesê vîjnayîşî.14ê gulane de vîjnayîşê ke benê eşkenê Kurdîstan û Tirkîya de bibê peynîye dewrêkî û destpêkerdişê dewrêkî. Îqtîdaro faşîst ê AKP-MHPyî seba ke vîn mekero do heme xîleyan bikero û heme metodanê zextî bifîno dewre. La se keno wa bikero do bin bikewo. Rijîyayîşê îqtîdarê 20 serran nêzdî bîyo. Bi ruhê Newroze û têkoşînê topyekunî serkewtişo biheybet qetî yo. Nê prosesî gerek her kes rolê xo kay bikero.

Xora dejê ma yê erdlerzî gird o la ma sey şarî zaf hole zanê ke dejê senî açarîyeno hêrsî û xoverdayîşî. Coka Newroza emserî zaf muhîm a. Semedê piştişê birînanê erdlerzî û vîjnayîş de binfînayîşê îqtîdarê AKP-MHPyî gerek bi ruhê seferberîye bêro xebitîyayene. Ma prosesê muhîmî de yê. Eke ma rolê xo  raşt kay bikerê, beno ke çîyê ke heta ewro ma vînî kerdî, ma înan reyna bifînê dest. Gereke her cayo ke şarê ma tede yo adirê Newroze bêro tafînayene û azadîya fîzîkîye ya Rayber Apoyî bêro waştene.''