Hemserekîya Konseya Rayberdişî ya KCKyî bi wesîleya Newroze eşkerayîye daye û nê vatî:

''Ma kewtê  prosesê Newroza newî ke sembola ganîbîyayîş û newe ra estbîyayîşî ya. Ma sere de Newroze bi ruhê xoverdayîş û têkoşînî pîroz kenê. Newroze vera têkoşînê mazlûman ê vera zaliman o ke bi bedelanê giran ame afirnayene. Kawayanê dewrê ma Newroze reyna resna manaya ci. Ma şexsê Şehîdê Newroze Kawayê Hemdemî-Mazlûm Dogan ,û ûşehîdê Newroze Zekîye, Rahşane, Ronahî û Bêrîvane  de heme şehîdê şoriş û demokrasîyî bihurmet, heskerdiş û mînetî yad kenê û sozê serkewtişî newe kenê.

Rayraşîyayîşê azadîye yo ke Rayber Apoyî prosesê Newroze de da destpêkerdene pancas serrî xo dima verdayî. Coka Newroza emserî dahîna zaf muhîm a. Rayber Apoyî pancas serrî cuwa ver Çubukê Anqara de bi kombîyayîşêkî gama verên a  rayîrê şorişê Kurdîstanî eşte. No rayraşîyayîşê azadîye heta ewro ame. Rayber Apoyî roja verêne ra zanayene ke şarê kurdî bi ruhê Newroze eşkeno newe ra bibo ganî.

Xora şarê Kurdîstanî tarîxî ra tim goreyê tradîsyonê Newroze ciwîya û vera zilm û zalîman xover da, payra mend. Rayber Apoyî bi afirnayîşê PKKyî şarê kurdî rensa nasnemeyê ci, Newroze reyde reyna art têhet. Coka Rayber Apo şarê kurdî sey şarê Newroze pênas kerd. Şarê kurdî deştan û koyan de adirê Newroze gir kerd û no adir Cizîre de, Nisêbîn de û ûca ra zî heme Kurdîstanî ra vila bi û bi serewedaritiş. Na mana de Newroze mergê zaliman, afirnayîşê mazlûman o.

Ewro îtîfaqo faşîst ê AKP-MHPyî seba ke qirkerdişê kurdan temam bikero, adirê azadîye hewna bikero her hetî ra hêrişê kurdan keno. Îqtîdaro faşîst Îmrali de Rayber Apoyî binê sîstemê tecrîdî tepişeno, vera gerîlayanê ke nêeşkeno vera ci ser bikewo çekanê kîmyewîyan şuxulneno û karekterê xo yê raştî mojneno. Başûrê Kurdîstanî, Rojawan, Şingal û Kampa Mexmûrî de her ca kurdan qetil kenê, cografyaya Kurdîstanî talan kenê ke qirkerdişê kurdan temam bikerê. Tayyîp Erdogan Deheqo zalim ê roja ma yo. Gerek şarê ma sey her serre emser zî meydanan de vera zaliman nêrazîbîyayîşê xo ramojno. Ma pê têkoşînê xo îqtîdaro faşîst ard bertengê rijnayîşî. Hinî wextê ci ameyo ke bi temamî bêro rijnayene.

Gerek sere de şarê kurdî şarê ma Newroze de sey mîlyonan vejîyê meydanan û îtîdarê AKP-MHPyî yo ke erdlerz de bi kiştoxê bi hezaran kesan, tira hesab biperso. Gerek Newroza emserî de şarê ma şînê xo biaçarno hêrsî û derûdorê adirê azadîye de vera îqtîdarê faşîstî tewirê xo ramojno. Şarê ma wa bi ziwan, nasname, kultur, rengan û kincanê xo yê neteweyî Newroze pîroz bikerê. Bi adirê Newroze do tarîtîye bêro roşnkerdene, şarî biresê azadîyanê xo,  kelayê zilmi bêrê rijnayene û zalîmî çîn bibê. Bi na bawerîye ma reyna Newroze Rayberîye ya Pancasine pîroz kenê.''