Komîteya Rayberdişî ya PKK’yî derheqê grevanê vêşanîye yê ke bi vengdayîşê Rayberê Şarê Kurdî Abdullah Ocalanî qedîyayî eşkerayîyêk daye.

Eşkerayîya PKK’yî wina ya:

“Xoverdayîşê grevê vêşanîye yo bêdem-bêagêrayîşo ke hetê Hemsereka KCD'yî û Parlamentera Colemêrgî Leyla Guvene zîndanê Amedî de 8’ê Teşrîna Peyêne de seba şikîyayîşê sîstemê tecrîdê Îmraliyî dabi dest pêkerdene, zîndananê Kurdistan û Tirkîya de, çar perçeyanê Kurdistanî de û her çar perçeyanê dinya de bi vila. Xoverdayîş 30’ê Nîsana ra tepîya zîndanan de açarîya rojeyê mergî û bi çalakîya tewr sixlete û derge yê tarîxî û roja xo ya di seyine de bi peyamê Rayberê Şarê Kurdî Abdullah Ocalanî ke vat xoverdayîşî netîce girewto roja 26’ê Gulan a 2019’î de bi serkewtiş qedîya.

Mucadeleyê Ma yê Azadîye û Demokrasîyî Dewam Keno

Bi nê xoverdayîşî hetê destkewtişan ra ma resayê dereceyêka muhîme. Labelê hewna Kurdistan azad nêbîyo û Tirkîya nêbîya demokratîke. Naye ra hemverê tecrîd û faşîzmî de heta ke Rayber Abdullah Ocalan bireso şertanê azad û ciwîyayîşê azadî, bingeyê azadkerdişê Kurdistanî û demokratîkkerdişê Tirkîya de do mucadeleyê ma dewam bikero. Hemleya ma ya ‘Ma tecrîdî bişiknê, faşîzmî birijnê, Kurdistanî azad bikerê û Tirkîya û Rojakewtena Mîyanêne bikerê demokratîk’ bi formanê hîna newe û dewlemendan dewam kena.

Ma Seba Mesuldarîye Veng Danê Heme Hêzanê Demokrasîyî

Ma Têgêrayîşê Azadîya Kurdistanî sey PKK veng danê heme hêzanê demokrasîyî yê ke zere û teber de yê ke mesuldarîya xo rê wayîr vejîyê. Reyna ma pawenê ke vervatoxê AKP’yî û Wezaretê Edaletî yê Tirkî sozê xo yê ke do Îmrali de huqûq bêro bicaardene rê bêkemasîyêk wayîr vejîyê û bica bîyarê. Nê bingeyan de ma wazenê bidê zanayene ke seba apeykewtişê zihnîyet û sîyasetê faşîstî û averşîyayîşê zihnîyet û sîyasetê demokratîkî çi bikewo milanê ma ser ma do bikerê.

Ma Hemleya Xoverdayîşî Biresnê Serkewtişî

Labelê na babete de ma do nêbê heto ke saf o û yeno xapênayene. Naye ra ma do pasîf nêmanê, ma do bibê heto ke bi hawayêkê aktîfî mucadele keno. Bi na bawerîye ma reyna Xoverdayîşê Grevê Vêşanîye yê Pîlî yo ke serkewtişêko tarîxî bi dest fîna pîroz kenê, şehîdanê xo yê qehremanan reyna bi vîr anê. Ma veng danê heme hemrayan, ciwanan, cinîyan, şarê xo, dostanê xo, hêzanê ma yê gerîlayan ê qehremanan, hêzanê şorişgêr-demokratan ke hemleya ma ya ‘Ma tecrîdî bişiknê, faşîzmî birijnê, Kurdistanî azad bikerê û Tirkîya bikerê demokratîke’ bi çalakîyanê afernayox û dewlemendan her wareyî de aver berê û biresnê serkewtişî!”