Komîteya Rayberdişî ya PKKyî derheqê Newroze de eşkerayîyêka nuştekîye daye.

Eşkerayîya Komîteya Rayberdişî ya PKKyî wina ya:

''Sey şarê kurdî û şaranê herême ma Newroza emserî dîye. Rixmê meseleyanê giranan û astengîyan zî her ca de adirê Newroze beno berz û Newroza ke Roşanê Azadîye yo tewr kahan o bi coşî yena fîrazkerdene. Newroze pê hevîyanê pîlan yena pêşwazîkerdene. Ma nê esasî ser o Newroza Rayber Apoyî, pêro embazan, gerîlayan, cinîyan, ciwanan, şarê ma yê welatperwerî fîraz kenê. Ma têkoşînê azadîye yê serra newîye ya Newroze de pêroyînan rê serkewtiş wazenê. Ma sere de Mazlûm Doganê Kawayê Hemserî şehîdanê Newroze Hakî Karerî ra heta Têkoşîne Amanos embazan Zekîye, Rahşane, Bêrîvane, Ronahî, Sema, Sînan, Nazdar û Serhat û pêro şehîdan bi rêzdarî yad kenê. Ma reyna soz danê ke ma do armancê înan bîyarê ca. Ma do sey têgêrayîş û şarî serra newîye ya Newroze de xeta Şehîdan û Rayberîye de hîna bihêz û xurt şer bikerê û ser bikewê.

Newroze Roşanê Azadîye yo tewr kahan a. Adirê Kawayê Asinkarî bi hezaran serran o ke rolê xo ano ca. Têkoşînê şarê kurdî yê vera Dehaqî hînî îlham dano pêro merdimîye. Ewro zî kurdî sey bi hezaran serrî verê cû vera Dehaqanê sey DAÎŞî, El KAîde, faşîzmê AKP-MHPyî bin kenê û merdimîye înan ra xelisnenê. Serra Newroze ya peyêne serrêk bîye ke hîşmendîya ke qirkerdişê kurdan farz kena ameye binkerdene û hêvîya azadîye her wextî ra zêdêr bîye bihêz.Ma bi nê hawayî dekewenê serra newîye ya Newroze. Her çiqas bi felaketê ''vîrusê Korona'' yeno xîretkerdene ke verê berzkerdişê azadîye bêro girewtene zî şarê ma yo welatperwer rayberîya cinîyan û ciwanan de zorî û astengîyan ra derbaz beno û Newroze fîraz keno. Şarê ma bi nê hawayî îradetê xo yê cuya azadîye newe ra mojneno. Îdîaya rijnayîşê faşîzmî û awankerdişê demokrasîyî her ca de bi hawayêkê eşkerayî yena dîyene.

Eşkera yo ke vîrusê Korona seba mojnayîşê îrade û têkoşînê azadîye yê ma sey astengîye yeno xebitnayene. Xora ganî şarê ma vera nê vîrusî tebdîranê xo bigêro, vera ci baldar bibo. Ganî na rewşe nêra peygoşkerdene. La mumkîn o ke ma nê astengîyan ra derbaz bibê û bi hawayêkê biusûlî Newroze fîraz bikerê. Xora şarê ma zî na çerçewe de şûmşînan de, fekberê keyeyê xo de, taxan de, kuçeyan de, dewan de û koyan de Newroze fîraz keno. Ma pê bawer ê ke sere de cinî û ciwanê ma şarê ma do bi tewiranê cîyayan rayîran bivînê. Ma venga şarê xo danê ke nê esasî ser o Newroze fîraz bikerê.

Îqtîdaro faşîstî na rewşa nêweşîye zî goreyê xo xebitneno û vera Başûr û Rojawanê Kurdîstanî hêrişanê xo dewam keno. Reyna eşkera bi ke heta ke faşîzmê AKP-MHPyî nêro rijnayene Tirkîya demokratîk û Kurdîstan zî azad nêbeno.Şarê ma yo welatperwer, hêzê demokratîkî û şorişgêrî do pêro astengîyan ra derbaz bibê, Newroze bi manaya ci fîraz bikerê, vera faşîzmê AKP-MHPyî tecrîd bişiknê û her ca de hemleya awankerdişê demokrasîyî aver berê. Bi ruhê xoverdayîşê Newroze zî do teqez ser bikewê. Netîce de do faşîzmê AKP-MHPyî do bêro rijnayene, tecrîd bêro parçekerdene, şert û mercê azadîya Rayber Apoyî do bêrê caardene. No zî do Tirkîya demokratîk û Kurdîstan azad bikero.

Nê esasî ser o ma reyna Newroza her kesî fîraz kenê. Ma venga şarê xo yê çar parçeyanê Kurdîstanî û şarê ma yê teberî danê ke bi averberdişê yewîya neteweyîye xoverdayîşê azadîye berz bikerê. Ma venga hêzanê demokratîkan-şorişgêran û şaranê Tirkîya danê ke vera faşîzmî û tecrîdî têkoşînê şorişê yewbîyayeyî pîl bikerê. Ma venga pêro şaranê Rojhelatê Mîyanênî û bindestan danê ke vera modernîteya kapîtalîste ya ke felaketanê pîlan ê sey Korona virazena têkoşînê demokrasîyî û azadîye pîya û bihêz aver bidê.''