Torra Ziwan û Kulturê Kurdan û Platformê Ziwanê Kurdkî çarçewa çalakîyanê 15ê Gulane Roşanê Ziwanê Kurdkî de qezaya Peyasî ya Amedî de 'Platformê Ziwanî' naro. Komeleya Kultur û Ziwanê Mezopotamya (MED-DER), Komeleya Kultur û Hunerî ya Dîcle, Ma Music, Komeleya Edebîyatkeran, DBP, HDP, KESK, Egitim-Sen û Wekîlê HDPyî yê Amedî Îmam Taşçier zî tewrê bernameyî bi.

Bername bi deyîra 'ziwanê kurdkî' û çepikan dest pêkerd.

Destpêk de Hemserekê MED-DERî Rifat Ronîyî qisey kerd û îfade kerd ke ziwanê kurdkî ganî bibo ziwanê perwerdeyî. Ronîyî vat: ''Îmkanê perwerdeyî nêdîya ziwanê kurdkî û tirkî domananê kurdan rê yena ferzkerdene. Ganî kurdî bi têkoşînê xo nê heqî bivisnê destî.''

Ronîyî ra dima Vervatoxê Platformê Ziwanê Kurdkî Şerefxan Cizîrî, Hemserekê DBPyî yê Rêzanî Hayrettîn Altunî, Temsîlkarê KESKî Firat Çelîk, mamostayê MED-DERî Nesîp Gultekîn zî qisey kerd û Endama Komeleya Edebîyatkeran Fatma Tunç zî şîîrêke wende.

Wekîlê HDPyî yê Amedî Îmam Taşçierî zî pare kerd ke kurdkî ser o tedayêka pîle est a û dewlete polîtîkaya asîmîlasyonî bêmabên ana ca. Taşçierî vat: ''Ma venga şarê xo danê ke wayîrê ziwanê xo vejîyo.''

Qiseykerdişan ra dima mamosta Mazhar Aktaşî war de bi hawayêkê temsîlî dersa ziwanê kurdkî daye.