Goreyê zanayîşan 1ê sibate de  polîsan bi hawayêkê zorî waşt ke Azad Dag (27) o ke birayê Wekîla HDPyî ya Amedî Dersime Dag o, dest bend bikerê û biremnê. Dag wexto ke zereyê wesayîtê xo de verê Nêweşxaneyê Cinîyan ê rayîrê Riha-Amedî de pabeyê waya xo bi, polîsê bi wesayîtê tîpê Ford Rangerî nêzdîyê ci bîyî, GBTyê ci waşt û bi îdîaya ''bira cigêrayîşî esta'' xîret kerd ke o destbend bikerê. Dago ke derheqê ci de birêka winasêne çin a vera polîsan nêrazîbîyayîşê xo mojna.

Polîsan waşt ke bi zorî Dag cinuşnê wesayîtê xo la Dagî nêrazîbîyayîşê xo mojna û red kerd ke cinuşo wesayîtê polîsan. Polîsan nêverda ke Dag venga avûkatê xo bido.

Dagî vat: ''Derheqê mi de bira cigêrayîşî çinbî la bi israrî vatêne ke esta. Polîsêkê gijiksipîyî çend reyî telefon de qisey kerd.''

Dagî venga merdimanê ke çîyêko winasên beno ke bêro sereyê înan da û vat: ''Qet çîyêkê winasênî qebul mekerê. Êyê ke naye kenê ganî bêrê kifşkerdene.''

Azad Dagî muracatê Şubeyê Amedî yê Komeleya Heqanê Merdiman (ÎHD) kerd.