Polîsanê rêjîmê Tirkî vizêr  eşt banê xîzmetî yê Şaredarîya qezaya Peyasî ya Amedî ser. Ame zanayene ke sereştiş rîyê gerreyî ra ame kerdene. Sereştişo ke hetê polîsanê Şûbeyê Mudurîya Narkotîkî ya Amedî ra ame viraştene bale ante xo ser.

Dimayê sereştişî hemşaredaranê Peyasî Kezîban Yilmaze û Davût Keserî pîya bi HDPyijna ke semedê paştdayîşî şîyê banê partîye eşkerayîyêk daye. Eşkerayîye de vera sereştişî nêrazîbîyayîş ame ramojnayene û ame vatene ke Şaredarîya Peyasî ser o kayê leyminî yenê kaykerdene la ê do vernîya nê kayan bigêrê. Hemşaredarê Bajarê Girdî yê Amedî Selçûk Mizrakliyî zî ard ziwane ke bi seretişanê winayênan yeno waştene ke partîya înan bêîtîbar bikerê la ê do destûrê naye medê. Mizrakliyî da zanayene ke ê do derheqê sereştişî de pêhesnayişê sucî bikerê.