Zerenca gozele tewirêkê mîlçin ra ya ke tewr zaf yena hes kerdene û zafane cayê kerrayin, zinarên, newale, ko û cayanê ziwayan de cuyena. Na mîlçike xeylê şîîre, hîkaye û kilamanê dengbêjan de ca gêna. Labelê tewirê na mîlçike polîtîkayanê şerî yê dewlete ver her ke şono çin beno.

Kurdî bawer kenî ke zerencê gozelî bi wendişê xo tayê nêweşîyan baş kenî û cok ra cayê zerencanê gozelan hetê kurdan de cîya yo. Zerencî bitaybetî pê toximê nebatan, kerm û kêz û reyanê nebatan miqate benî. Nêrî û makîya zerencan yewbînan bimanî zî, sereyê nêrî yê makîyan ra girdêr î.

HÛMARA ÎNAN ZAF KÊMÎYAYA

Polîtîkaya şerî ya dewlete û şewatê ke hetê dewlete ra yenî vetene ver, no tewir ver bi çinbîyayîşî şono. Herçiqas ke heta nika xeylê reyan derheqê rewşa zerencanê gozelan de melumat dîyayo cayanê eleqederan zî, heta nika çîyêk nêameyo kerdene.

Ahmet Batmazo ke Şirnex de cuyeno seba zerencanê gozelan etirîyeno. Batmaz vano ‘keyeyê mi zaf eleqe nîşanê zerencan dayêne’ û wina domneno: “Mi çimê xo keyeyo ke tede zerencî ameyêne miqate kerdene de akerdî. Pîyê mi zî kalikê mi ra musayo. Ma qefes mîyan de vindarnayêne, labelê ma sey çimê xo ewnîyayêne. Estena zerencan huzir dano ma. Wendişê zerencan tayê nêweşîyan rê baş o. Ma qîmîşîya zerencan nêkenî, labelê dewlete kena.”

HETÊ DEWLETE RA YENO ÇIN KERDENE

Batmaz dano zanayene verê cû xeylê zerencê gozelî koyê Cûdî de est bîyî, labelê şewat û operasyonanê leşkerîyan ver êdî ê zerencan nêvînenî. Batmaz wina vano: “Domanîya mi de her 10 keyeyan ra 3 keyeyan de zerencî estbî. Labelê nika çîyêko winasî çin o. Dewlete seba ke tebîetê koyê Cûdî û Gabarî xira bikera, heme çî kena. Ganî na rewşe demêko raver bêra vindarnayene.”