Federasyonê Komeleyanê Dêrsimî (DEDEF) qezaya Kadikoyî ya Îstanbulî de bi çalakîyêke talanê Çimeyanê Munzurî protesto kerd. Hemwelatî û sîyasetmedarî zî tewrê çalakîye bîyî. Çalakîye de pankarta bi nuşteyê 'Dest mede Munzur' ameye akerdene. Hemwelatîyan vera sloganê sey 'Munzur do azad bihêriko', 'Sermaye wa Munzurî ra def be' vatî. 

Çalakîye de  endama DEDEFî Hulya Guntaş eşkerayîye wende. Hulya Guntaş viste vîrî ke Çimeyê Munzurî hem warê SÎTî yê hem zî seba elewîyan fîraz ê. Hulya Guntaş pare kerd ke caardişê nê projeyî hêrişê vera kultur, bawerî û vîrê elewîyan o.  Hulya Guntaş îfade kerd ke mudaxeleyê vera Çimeyanê Munzurî nêno qebulkerdene û ê do nêverdê ke binê nameyê projeyê peyzajî de Çimeyê Munzurî bêrê texrîbkerdene û talankerdene.

Hulya Guntaş vat: ''Ganî Çimeyan de tabelaya bi nuşteyê 'Warê SÎTî' bêra dardekerdene, rîtuelê bawerîye ra berî Çimeyê Munzurî bêrê padayene. Ganî awanîyê sey tuwaletan cayê tewr raştî de bêrê viraştene. Ganî xoza bêra pawitene. Ganî çopê tay dewan Çimeyan ra bêrê vetene û awanîyê kahanî bêrê wedaritene.''

Eşkerayîye ra dima vilawekî ameyî vilakerdene.