PSK û PAK: Heme Kurdî ganî vera îşxalî tewir bîgêrê
PSK û PAK’î veng da ke wa heme Kurdî vera hêrişê îşxalê heme leteyanê Kurdistanî de tewir bîgêrê.
PSK û PAK’î veng da ke wa heme Kurdî vera hêrişê îşxalê heme leteyanê Kurdistanî de tewir bîgêrê.
Partîya Sosyalîste ya Kurdistanî (PSK) û Partîya Azadîye ya Kurdistanî (PAK) derheqê hêrişanê îşxalkarîye yê dewleta Tirkî de eşkerayîyêka hempare daye û veng da ke wa heme Kurdî vera îşxalî de tewir bîgêrê.
Serekê Pêroyîye yê PSK’yî Bayram Bozyelî vat: ‘’ Vera Kurdan hêriş û planê stratejîkî yenê rayraberdene. Tirkîya xeylî wextî yo Başûrê Kurdistanî bombardûman kena û operasyonanê eskerî virazena. Tirkîya nika zî verê xo dayo Rojawanî. Dimayê îşxalê Efrînî wazenê ke erdê Rojawanî yê bînî zî îşxal bikerê û Sûrîyeyijan tîya ca bikerê. Waştişê Tirkîya oyo ke Kurdî qet leteyêkê Kurdistanî de wayîrê statu nêbê. Ganî heme aktorê sîyasîyî yê Kurdan dormeyê stratejîyêka neteweyîye de bêrê têhet û vera nê hêrîşan de tewirê xo ramojno. No wezîfeyêko tarîxî yê heme Kurdan o. Meseleya Kurd û Kurdistanî meseleya terorî nêya û bi operasyonanê tebebê sînorî nêna çareserkerdene. Ganî heqê neteweyîyî yê demokratîkî yê Kurdan bêrê naskerdene. Ma tîya ra veng danê heme partîyanê sîyasîyan ê çar parçeyanê Kurdistanî û şarê welatperwerî wa vera hêrişanê vera Kurdan bêveng memanê û provokasyonanê pêkewtişê mabênê Kurdanî pûç vejê.’’