Dima ke rojnamegerî Gulîstane Tara û Hêro Bahadîn ameyî qetilkerdene vejîya werte ke koordînatê wesayîtê rojnamegeran hetê PDKyî ra dîyayê dewleta tirke. PDKyî teyna vera têgêrayîşê azadîye ney vera pêro kesanê ke seba azadîya kurdan şer kerdêne hetê kolonyalîstan de cagirewte. 

PDKyî tim hêrişanê dewleta tirke yê vera Başûrî de cagirewt. PDKyî tarîx de tim vera têgêrayîşê azadîye û şarê kurdî îxanet kerd. Tarîxê hemkarîye yê PDKyî zî heta Komara Mehabadî şino.

Mala Mustafa Barzanîyî serkêşanê kurdan ra Qazî Mihemedî de peymanêke viraştbi. La rixmê ney zî wexto ke Îranî hêrişê Komara Kurdîstanî ya Mehabadî kerdbî ey Qazî teyna verdabi.

PDKyî qetilkerdişê Doktor Şivanî de zî rolêko pîl kay kerd. Doktor Şivanî serrgêra dardekerdişê Şêx Seîdî de 11ê temmuza 1965î de ronîyayîşê PDK-Tyî îlan kerd. Berpirsîyarê Partîya Demokrate ya Kurdîstanî ya Tirkîya Saît Elçî wexto ke şîyêne pêvînayîşê bi Mala Mustafa Barzanîyî ame qetilkerdene. Qetilkerdişê Saît Elçîyî ra dima Doktor Şivan (Saît Kirmizitoprak) bi fermanêkê Mala Mustafa Barzanîyî sey sebebê Elçîyî ame îlankerdene û îdamkerdene. Qetilkerdişê Elçîyî ra dima eşkera bi ke serebût bi fermanê MÎTî hetê PDKyî ra ameyo kerdene.

Dewleta tirke 1983 de vera Başûrî 'Operasyonê Teqîbê Germinî' dabi destpêkerdene. Operasyonî ra ver zî dewleta tirke Bexdad de 'Peymana Asayîşê Sînorî û Hemkarîye' îmza kerde. Na peymane ra dima Tirkîya bi destûrê PDKyî 1995 de Başûr de baregehê xo yo verên awan kerd. PDKyî destûr da ke herêmanê xo de MÎT têbigêro. PDKyî dima hêrişê gerîlayan zî kerd. PDK bi tewirê tûjî yê gerîlayan bin kewt, Tirkîya ra ardim waşt û vengdayîşê Tirkîya ser o kewte Başûrî.

Artêşa tirke heta nika bi desan baregehî Başûr de nayî ro. Nînan ra tayî wina yê: Şeraniş, Kanîmasî, Begova, Amediyê, Batûfa, Şeladizê, Kirîbî, Sinekî, Sirî, Kubkê, Qumrî, Koxê Spî, Serê Zêr ve Geliyê Zaxo, Hewlêr, Dihok, Zaxo û Amedîyê de yê.

Serranê 90an de têgêrayîşê azadîye mîyanê şarî de vila bi. PDKyî û dewleta tirke vera ney têkilîya xo xurtêr kerde. Şerê Korfezî yê 1inî ra dima hêzê mîyanneteweyîyî Başûr de cabîyî. Dewleta tirke mabênê 5-13ê tebaxa 1991î de bi 5 hezar leşker û qoricîyan operasyonê 'Supurge' da destpêkerdene û kewte Başûrî. Nînan ra dima Tirkîya 6ê gulana 1992yî de operasyonê Kazma û 28ê hezîrana 1992yî de operasyonê Çekîç-Guçî kerdî.

2yê teşrîna verêne ya 1992yî de narey zî YNK, PDK û artêşa tirke vera PKKyî operasyonêk da destpêkerdene. Nê operasyonî heta 15ê teşrîna peyêne ya 1992yî dewam kerd. Şer de qasê se gerîlayî şehîd bîyî.

21ê adara 1995î de PDKyî vera gerîlayan şero tewr pîl o diyîn kerd. Şerî heta 2yê gulane dewam kerd. Şer de Başûr de 200 sivîlî merdî, 15 hezar sivîlan koç kerd.

22yê tebaxa 1996î de Barzanîyî Sadam Huseynî rê mektube şawite û bi xîtabê 'Serekê m' Huseynî rê wina vat: ''Ez cenabê şima ra wazena ke bi artêşa xo peynîya îxanetê Celal Talabanîyî bîyare, artêşa Iraqî debikewa Hewlêrî.''

Sadam Huseynî vengdayîşê Mesûd Barzanîyî ser o 31ê tebax 1996î de vera YNKyî kewt Hewlêr. Pêkewtişanê mabênê YNK û artêşa Iraqî de 40 pêşmergeyê YNKyî şehîd bîyî, bi seyan pêşmergeyî birîndar bîyî.

PDKyî 6ê adara 1996î de destek da operasyonê 'Atmaca-Tokatî' yê dewleta tirke. 1997 de zî PDKyî destek da operasyonê Balyozî. Wextê nê operasyonî de 16ê gulana 1997î de Hewlêr de PDKyî gerîla, doktor û rojnamegerî zî tede bi desan kurdî qetil kerdî.

PDKyî 1997 de ancî bi pêro hêzê xo destek da operasyonanê 'Çekîç' û 'Şafakî.' PDKyî 1998 de destek da operasyonê 'Muratî' û operasyonê 'Sandvîçî.'

PDK ewro hema zî destek dano operasyonanê Tirkîya, artêşa tirke Başûr de cakeno û hema zî îxanetê şerwananê dewaya azadîye keno.