Qeyûmê Şaredarîya Wanî destûr da ke bînayêka 9 qate bêra berzkerdene. Wezîrîya Karanê Zereyî vera qeyûmî tehqîqat nêda destpêkerdene la wexto ke 2014 de Şaredarê BDPyî (Partîya Haştîye û Demokrasî) ya Wanî destûr dabî ke bînayêka 8 qate bêra berzkerdene derheqê ci de tehqîqat dîyabi destpêkerdene. Meclîsê Şaredarîya Rêya Armûşî 2014 de bi birêke planê awankerdişî de tay vurnayîşî kerdî. Şaredarîya Wanî zî na bire tesdîq kerde.

Wezîrîya Karanê Zereyî bi bahaneya ney Hemşaredarê Wanî Bekîr Kaya û Hemşaredarê Rêya Armûşî Veysel Keser zî tede derheqê 30 endamanê Meclîsî yê BDPyî de cigêrayîş dabi destpêkerdene.

Cigêrayîşî ra dima zî derheqê hemşaredar Bekîr Kaya, endamanê verênan ê Komîsyonê Awankerdişî Cahît Bozbay, Cevdet Altindag, Hamdiye Çîftçî, Suleyman Can, Firat Gençer, Pinar Demîr, Naîb Saglam û wekîlanê Serekê verênî yê Dayîreyê Şaristanîye û Awankerdişî Zulfukar Damar, Cîhan Vahap Elmasî de tehqîqat dîya destpêkerdene.

Rixmo ke Mehkemeya Şêwirmendîye û Mehkemeya Muhasebatî nê kerdişan de sûc nêdî Wezîrîye bi israrî newe ra tehqîqat akerd.

Endamê Meclîsî yê BDPyî Cevdet Altindagî serebût ercna û da zanayene ke seba ke înan destûr dayo ke bînaya 8 qate bêra berzkerdene dima derheqê înan de dewa zî ameya akerdene. Altindagî vat: ''O çax derheqê ma de 9 dewayî ameyî akerdene. Nika qeyûmî heman destûr dayo la derheqê ci de cigêrayîş zî nêno kerdene. O çax ma çita kerd bi sebebê tehqîqatî.''