Qeymaqamê qezaya Çemizgezekî ya Dêrsimî Mehmet Guder 6 rojî verê cû pê wesayîtê xo da hemwelatîyê bi nameyê Murat Atli. Mehmet Atliyo ke xebatkarê Şaredarîya Xarpêtî bi,  nêweşxane de dinyaya xo bedilnaye. Heta nika îfadeyê Guderî nêame girewtene. 

Goreyê raporê qezayî qezayê trafîkî de Mehmet Atli 'sûcdar' bi û yew xeletê Mehmet Guderî çin o. 

Şahîdanê ke embazanê karî yê Atliyî yê, vera mesele nêrazîbîyayîşê xo mojna. Goreyê şahîdan serebût wina qewimîya: ''Wexto ke ma derbazê kişta bine ya rayîrî bîyêne wesayît gina embazê ma Atli ro. Sereyê embazê ma şikîya. Embazê ma zewijnaye û wayîrê domanan ê qijan bi. Ma dima musayî ke wayîrê ê wesayîtî qeymaqam o. Peyê înan de walî, çapemenîye, şaredarîye, edlîye estê. Qeymaqam serbest o û qeza roja şemeyî qewimîya û o roja dişemeyî agêra karê xo. Ganî heta ke cigêrayîşê serebûtî bêro temamkerdene qeymaqam nezaret de bimendêne. Na bêwayîrî ya.''