Dewa Zeyra ya qezaya Wêranşarî ya Riha de keyeyê êzidîyî raştê gef, teda û hêrişê qoricîyan yenê. Keyeyan vera na bêhuqûqîye eşkerayîye daye çapemenîye. Keyeyanê êzidîyan pare kerd ke dewlete û hêzê dewlete destek danê qoricîyan.

Eşkerayîya xo de êzidîyanê Zeyra pê hesna ke ê Almanya de manenê, hamnanî yenê dewe. Êzidîyan vat ke eşîra Şêxan ra keyeyê Karacadagî 25 serrî verî bi zorî dewe de cabîyo û dest nayo mal û mulkanê înan ser. Eşkerayîye de wina ame vatene: ''Seba ke ma êzidî yê û dewe de nîyê no keye xîret keno ke banê ma zî xesp bikero û pê kiştişî ma tehdît keno. Keyeyê Karacadagî seba ke qoricî yê paştîya xo daya dewlete ro û tîya de xo rê sîstemêkê zorbazîye nayo ro. Qoricîyê nê keyeyî pê çekan gefan wenê û nêverdenê ke dewijê ke Ewropa de yê abigêrê dewe. 

5ê temmuze de nê qoricîyan da rayîrê verê ma girewt û da motoranê ma yê citî ro. 11ê temmuze de zî nînan sîstemê ma yê awdayîşî şikna û ma tehdît kerdî.

Ma no serebût resna hêzanê dewlete, muracatê Serdozgerîya Komare ya Wêranşarî û qeymeqamîye kerd la çîyêko cidî nêamekerdene. Ma bi serran o vera nê kerdişan têgêrenê la çewî nê qoricîyan rê vengê xo nêkerd. Ma pêro selahîyetdar û berpirsan ra wazenê ke mesuldarîya xo bikerê. Ma wazenê abigêrê erdê babî û pîranê xo ser, keye, bax û baxçeyanê xo newe ra awan bikerê la no keye tim ma rê gefan waneno.''