Raporo ke hetê ÎHD, TÎHV, ŞTB û SES’î ra derheqê Zîndanê Şirnexî de ameyo amadekerdene, ke serê 22 tepişteyanê grevê vêşanîye de yo, ame vatene ke halê çalakgeran beno xirab, çalakgerî bi zehmetîye rakewenê, vîrê înan şino.
Şaxê Komeleya Heqanê Merdiman (ÎHD) yê Şirnexî, Weqfê Heqanê Merdiman ê Tirkîya (TÎHV), Merkezê Referansî yê Cizîre, Odaya Tabîban a Şirnexî (ŞTB), Sendîkaya Kedkaranê Xizmetê Cimatkî û Weşîye (SES) derheqê halê 3’ê înan cinî 22 tepişteyanê Zîndanê Şirnexî yê Tîpê T’yî de yê ke seba wedartişê tecrîdê serê Rayberê Şarê Kurdî Abdullah Ocalanî grevê vêşanîye de yê raporêk amade kerd û rayapêroyîye dir pare kerd.
Raporo ke 4 rîpelan ra yeno pê, mektûbanê ke hetê çalakgeran ra ameyê şirawitene rê zî ca ame dayene. Bi heman hawayî pêvînayîşê dozgerê zîndanî, mudurê zîndanî û tepişteyan zî rapor de ca girewt. Destpêkê raporî de 13 mektûbê ke hetê çalakgeran ra ÎHD’yî rê ameyê şirawitene ca girewt.
Tepişteyî: Ma ser o Tecrîd Ameyo Ronayene
Rapor de problemê ke tepişteyî ciwîyenê ca gênê û wina ameyê rêzkerdene;
“* Heqê ma yê aktîvîteyan ê hewteyî de 10 saetî hetê îdareyê zîndanî ra ameyo bisînorkerdene. Ma nêeşkenê embazanê xo yê koxuşe dir deqayêk zî qisey bikerê. Bi nê hawayî ma odayanê xo de ameyê tecrîdkerdene.
* Tedawîya embazanê ma yê nêweşan îhmal kenê.
* Hetê îdareyî ra radyoyê destan, la, teşt û rîyênivînan ê ke ma kantînî ra herînayê ameyê destsernayene.
* Aktîvîteyê ma yê sey hobi, spor, atolye û kare destan ameyê bisînorkerdene.
* Bi hawayêkê barbarîyî ma sehnenê.
* Mîyanê embazanê ma yê ke cezayê înan serrêk ra kemî mendê, yê ke hetgêr ê û
hetgêr nêyê înan yewbînan ra dûrî fînenê û hemverê prensîbê seypêyîye yê heyetê çimdarî de têgêrenê.
* Talîmatê eleqedarê aktîvîteyan ê wezaretî yê bi tarîxê 04/02/2019 û bi hûmara 66708689-204.0800-E 324/18980 ke muracatê ma ser o ameyo şirawitene nêno bicaardene.
Rapor de heman wextî de ame vatene ke dozger û mudurê zîndanî dir derheqê halê zîndanî de pêvînayîş ameyo kerdene û înan ra ameyo waştene ke problemê tepişteyan bêrê çareserkerdene.
Rapor de vajîya ke tepişteyan dir problemê weşîye yê sey şîyayîşê vîrî, viritiş, rakewtiş de antişê zehmetîye, roqirayanê înan ra ameyîşê gonî û vînayîş de problemî estê. Dewamê raporî de zî ame vatene ke çalakgerê bi nameyê Agît, Bîlîk, Ebûbekîr Neng, Salih Kûtlûk û Hakan Petekkya yê ke mabênê 16 û 31’ê Çele de kewtê grevê vêşanîye halê înan ê weşîye bîyo xirab.
Peynîya raporî de ame waştene ke heme problemi bê ke erey bimanê bêrê çaraserkerdene.
