Artêşa tirke ya îşxalkere 20ê temmuze de, nêzdîyê serrgêra Peymana Lozanî de herêma Şehîd Delîlî ya Rojawanî Zapî bi operasyonêkê neweyî îşxal kerd. Artêşa tirke bi nê hawayî xîret kerd ke mesajan zî bidê sîyasetî. Mesajo ke artêşa tirke waştêne bida wina b: ''Serra 100. ya Lozanî de qirkerdiş, îşxal, sûcê şerî, pêro xirabîyî do dewam bikerê.''

Xora gerîlayî hînî karakterê artêşa tirke hol şinasnenê û zanenê ke çarenûsê kurdan masaya îtîfaqê îşxalkeran de ney çeperanê înan de yo. Coka gerîlayî şer û têoşînî ra ber paştîya xo nêdanê qet yew hêzî û têkoşînê xo rê dewam kenê. Nimûneyanê nê şerî ra yew zî Girê Cûdî de, herêma Şehîd Delîlî yê Rojawanê Zapî de qewimîyeno.

Artêşa tirke şerê 7 mengan ra dima neçare mendbî ke xo nê warî ra apey bianca û nê warî de prestîjê xo zî vînî kerdbî. Artêşa tirke 14ê nîsana 2022yî de herêma Zapî de operasyonêk dabi destpêkerdene û verê xo da çeperanê xoverdayîşî yê Sîda û rojawanê Zapî. Artêşa îşxalkere armanc kerdbî ke pêro Zapî îşxal bikera la nêeşkaye. Operasyonê ci yê Zapî bin kewt. Artêşa tirke bi operasyonê 20ê temmuza 2023yî kerd ke xo bixelisna.

Hetê bînî ra artêşa tirke vatêne ke gerîlayî do nêeşkê sey verî xo ver bidê. Artêşa tirke xîret kerd ke reya diyîne Girê Cûdîyî de cabiba. La hesabo ke qerargehî kerd reyna Zap de raşt nêbi. Gerîlayan cara menga kanûne ra nata Girê Cûdîyî de bi xurtî amadekarîyî kerdêne. 20ê temmuze de gerîlayan bi tedbîrî, hişyarî û hayîdarî cewab da xîretê îşxalî yê artêşa tirke. Nê hêrişan de heta nika gerîlayan yew şehîd zî nêda û ê hema zî wina çeperanê xo pawenê.

Merkezê Îrtîbatî û Çapemenîye yê HPGyî raştîya şerî bi hawayêkê hîrayî her roje pê eşkerayîyan pare keno. La artêşa tirke ya îşxalkere nasnameyanê leşkeranê xo yê kişteyan eşkera nêkena ke xo sey serkewte biimojna. Teyna vat ke 'herême de helîkopter ginayo war, çend leşkerî merdê.' Reyna vat ke leşkerê bi nameyê Erdem Kavlakî bi çeka xo qeza de merdo, Gabar de qoricîyêk ginayo war merdo. Oyo ecêb no yo ke senî keyeyê înan zî nêvanê ke çira her roje na artêşe de qeza qewimîyeno.

Artêşa tirke nasnameyê leşkeranê xo yê kişteyan nimnena. Gerîlayan bi desan reyî no çi îsbat kerd. Warê Girê Cûdîyî de şerê 5 rojan de tewr tay 25 leşkerî ameyî kiştene.

Gerîlayanê YJA-Starî û û HPGyî vera hende xirabîyan dek û dolaban û zûran ra dûrî bi hawayêkê zelalî û duristî şer kenê. 2022 de 7 mengan de şerê vera war û tunelan de artêşa tirke derbê giranî werdî û xo apey antbi. Netîceyê rojanê verênan ê nê şerî zî mojnenê ke herêma rojawanê Zapî de serkewtişo diyîn do biqewimîyo.