Rayber Apoyî êzidîyan rê mesajêk şawit. Mesaj wina yo:

‘’No proses do bibo Ronesansê Êzidîyan.

Şarê êzidîyan pêro tarîx de bi qirkerdiş, surgun, zulm û dejan îmtîhan bi. Êzidîyî şaranê Mezopotamya yê tewr qedîman ra yew o. Êzidîyan seba wayîrvejîyayîşê nasname, kultur û estbîyayîşê xo zaf bedelî dayî. Trajedîya êzidîyan wijdanê merdimatîye de cabîye.

Êzidîyî tim raştê hêrişan ameyî la înan rixmê her çîyî zî xo ver da. 2014 de qirkerdişo ke Şingal de qewimîya dewamê ferasetê çinkerdişê êzidîyan bi. La êzidîyan o çax bi lezî têkoşînê azadîye kerd, xo rêxistin kerd û xo ver da. Zaf manadar o ke cinîyê êzidîyî zî tewrê nê xoverdayîşî bîyî. Êzidîyî dekewtî prosesê awankerdişê ameyoxê xo.

Ameyoxê êzidîyan do goreyê cewherê xo û îradeyê xo yê demokratîkî yanî goreyê esasê komelê demokratîkî şikl bigêro. Ganî rêxistinîya komelêkê winayêne bêra awankerdene ke êzidîyî tede bawerîya xo bi azadî biciwîyê. Na safha de zaf girîng o ke komelo demokratîk bêro înşakerdene, estbîyayîşê êzidîyan o tarîxî bipawîyo û dewam bikero.

Bingeyê komelê demokratîkî de ma eşkenê ameyoxêkî awan bikerê ke şarî tede azad û têdûşt bibê. Ganî êzidîyî înşaya komelê demokratîkî û têkoşînê demokratîkbîyayîşî de hêzê aktîfî bibê. Nêzdîbîyayîşê ke azadîya êzidîyan çin hesibnenê meşrû nîyê. Ganî êzidîyî her ca de xo rêxistin bikerê û ameyoxê xo bigêrê binê garantî. Têkoşînê seba cuya têdûşte û azade mesuldarîya pêro şaran a.

Bi na wesîle ez têkoşînê şarê ma yê êzidîyan selam kena. Ez her şert de paştî dana waştişê înan ê azadîye. Azadîya êzidîyan û azadîya şaranê Rojhelatê Mîyanênî tim têzere yê. Coka Vengdayîşê Haştîye û Komelê Demokratîjî 73 fermananê vera êzidîyan rê cewabêk o. No proses do tewr zaf azadî û estbîyayîşê şarê ma yê êzidîyan bîyaro ca. No vengdayîş yew Ronesans o û tewr zaf do bibo Ronesansê êzidîyan. No proses do bi têkoşîn û hîsê hemparî ser bikewo. Ez ancî selamê xo yê bêpeynîyî şawena.

Abdullah Ocalan.’’