Seba azadîya Rayberê Şarê Kurdî Abdullah Ocalanî û çareserîya meseleya kurdan şaristananê Vakurê Kurdîstanî de di baskan ra Rayraşîyayîşê Azadîye yo Pîl yeno kerdene. 

Hemserekê DBPyî Keskîn Bayindir, Hemsereka MED TUHAD-FEDî Emîne Kaya, wekîlê DEM Partî zî tede Baska Wanî resaye qezaya Hezexî ya Şirnexî. Rayraşîyayîş de vera sloganê sey Bijî berxwedana zindanan", "Bijî berxwedana Îmraliyê" ameyî vatene.

Şarî Hezex de raywanî pêşwazî kerdî. Mayanê Haştîye bi laçikanê sipîyan selam da Raywananê Azadîye. Girseyî esnafî zîyaret kerdî û ver bi Rêxistina Hezexî ya DEM Partî şi.

Tîya de beşdaranê Rayraşîyayîşê Azadîye ra Cemîl Taşkesenî qisey kerd û vat: ''Tecrîd sûcê vera merdimatîye yo û goreyê Îslamî nîyo. Bêrê ma pîya bikewê binê na bare û meverdê ne gerîlayî ne zî leşker û polîsî bimirê. Çareserîya meseleya kurdann Îmrali de ya.''

Namzeda Şaredarîya Hezexî ya DEM Partî Turkane Kayir bi sûryankî selam da raywanan. Namzedê bînî Dogan Adibellîyî zî ard ziwan ke heta ke Rayberê Şarê Kurdî azad bibo ê do têkoşînê xo rê dewam bikerê. Adibellîyî vat: ''Çareserîye bi akerdişê berê Îmraliyî bena. Heta ke Rayberê ma azad bibo ma do nêvinderê.''

Dima girseyî govende girewte û deyîrî vatî. Girse Hezexî ra dima do verê xo bido qezaya Nisêbînî ya Mêrdînî.