Di baskan ra Rayraşîyayîşê Azadîye yo Pîl seba azadîya Rayberê Şarê Kurdî Abdullah Ocalanî û çareserîya meseleya kurdan dewam keno.

Baska Wanî roja 7ine de resaye qezaya Cizîre ya Şirnexî. Mayanê Haştîye bi sloganan girse pêşwazî kerd. Pêşwazîkerdiş de merşê Berxwedan Xweş Doz e” û “Herne Pêş” ameyî wendene. Dima girse û Mayanê Haştîye ver bi merkezî rayraşîyayîş kerd.

Verê bînaya DEM Partî ya Cizîre de Wekîla DEM Partî Salîha Aydenîz qisey kerd û vat: ''Ma seba azadîya Birêz Abdullah Ocalanî nê rayraşîyayîşî kenê. Wa dewlete û îqtîdarê AKP-MHPyî bizanê ke ê do nêeşkê rayraşîyayîşê ma asteng bikerê. Wextê Prosesê Çareserîye de ame dîyene ke Birêz Ocalan eşkeno haştîye bîyaro. Ma tîya ra zî veng danê ke seba azadîya Kurdîstanî û demokratîkbîyayîşê Tirkîya ganî muxatabîya Birêz Ocalanî bêra şinasnayene.''

Namzetanê Şaredarîya Cizîre yê DEM Partî Gulere Tunç û Abdurrahîm Durmuşî qala tecrîdê Îmraliyî kerde û bale ante têkoşînê Cizîre ser.

Dima Mayanê Haştîye lapik û patikê ke munitî û mektubê ke seba Ocalanî nuştê dayî Raywananê Azadîye.

Verê bînaya partîye de ê kesê ke wextê qedexeyê tebervejîyayîşî yê Cizîre de ameybî qetilkerdene ameyî yadkerdene.