Seba azadîya Rayberê Şarê Kurdî Abdullah Ocalanî û çareserîya meseleya kurdan di baskan ra Rayraşîyayîşê Azadîye yo Pîl yeno kerdene. Baska Wanî ya 'Rayraşîyayîşê Azadîye yê Pîlî' roja 6ine de resaye qezaya Silopîya ya Şirnexî. Raywanan seba ke serrgêra erdlerzê 6ê Sibate ya, kurdeleyê sîyayî bestî yeqaya xo ra. Mayanê Şemeyî raywanî pêşwazî kerdî.

Girseyî heta bînaya DEM Partî ya Silopîya rayraşîyayîş kerd û dima seba mexdûranê erdlerzî deqayêk rêz girewt. 

Wekîlê DEM Partî yê Colemêrgî Onur Duşunmezî tîya de qisey kerd û vist vîrî ke Rayberê Şarê Kurdî Abdullah Ocalan 25 serrî yo binê tecrîdî de yo. Duşunmezî vat: ''35 mengan ra nata Birêz Ocalanî ra xeberêke nêna girewtene. Coka ma nê rayraşîyayîşî kenê. Ma domanê Dayîke Taybete yê. Ma hemrayê Sêvêyan ê. Ma do ser bikewê, azadîya Birêz Ocalanî bîyarê ca û azadîye bîyarê nê erdî.''

Sakîne Demîra ke kênaya ci Sêvê Demîr wextê qedexeyê tebervejîyayîşî de amebî qetilkerdene vat: ''Ez nê rayraşîyayîşî selam kena, ma do qetî ser bikewê. Ganî dadîyê leşker polîs û qoricîyan zî ma hetî de bibê. Wa tecrîd wedarîyo, cenazayî zîndanan ra nêvejîyê û Serek Apo azad bibo.''

Namzetanê Şaredarîya Silopîya yê DEM Partî Jîyane Ormanli û Rênas Nadîr Onukî zî pare kerd ke Rayraşîyayîşê Azadîye do tecrîdî bişikno.

Mayanê Haştîye qiseykerdişan ra dima laçikê xo yê sipîyî milê raywanan ra girê dayî.