Fermandarê Yewinanê Pawitişê Rojhelatê Kurdîstanî (YRK) Şoreş Alanî rewşa Îranî û Rojhelatê Kurdîsyanî ya prosesê vîrusê Korona de û sîyasetê rejîmê Îranî yê vera şarê Îranî û Rojhelatê Kurdîstanî ercnayî. Qiseykerdişê Şoreş Alanî ra beşêk wina yo:

''Vîrusê Korona sey felaketêk pêro dinya de vila beno coka ganî şarê ma yê Rojhelatê Kurdîstanî zî vera ci tedbîranê kxo bigêro. Ganî nê wextê nêweşîye de bi hawayêkê xoserî dewe, bajar û qezayan de wezîfeyê pawitişî, vergirewtişî û pakîye bêro caardene. Ez venga ê kesanê ke îmkanê ci estê dana ke hetkatîya merdimanê hewcedaran bikerê. Ganî şarê ma dewlete ra çîyêk nêpawo û pawitişê xo bikero. Ez pêro tepişteyanê sîyasîyan rê selam kena. Keyeyê şehîd Mustafa Selîmî rê serweşîye wazena. Dardekerdişê embaz Mustafa Selîmî mîsalêkê sîyasetê rejîmê Îranî yo. Vîr û azadîya şarê ma sayê kesanê sey embaz Mustafa geş benê. 

Rejîmê Îranî yo îşxalker wazeno pê sîyasetê vêşanverdayîşî îradeyê şarê ma teslîm bigêro. Her roje ciwanê kurdî sînoran de kişîyenê û birîndar benê. Beşêkê şarê xizanî neçare yo ke pê birnayîşê daran û viraştişê komirî debarê xo bikerê. Ma sey YRK wayîrê tewirêkê zelalî yê; ma vera birnayîşê daran û rijnayîşê xoza yê. Ganî her kes xoza bipawo. Ganî kesê ke îmkanê ci estê wayîrê kesanê xizanan bikerê ke neçarîye ra daran birnenê û bi nê hawayî sîyasetê rejîmê Îranî pûç bikerê.Kesê ke xeyalê înan ê azadîye esto, cade têkoşînê azadîye de ca bigêrê û tewrê gerîlayan bibê.''