Wekîla HDPyî ya Amedî Remzîye Tosun polîtîkayê hukmatî ANFyî rê ercnayî û îfade kerd ke ganî mesajo ke Rayraşîyayîşê Gemlîkî de ameyo dayene ganî bi hawayêkê raştî bêro ercnayene.

Wekîla HDPyî ya Amedî Remzîye Tosun vist vîrî ke Rayberê Şarê Kurdî Abdullah Ocalan 1999 ra nara Zîndanê Îmraliyî de bi hawayêkê giranî binê tecrîdî de yo û vat: ''Tecrîd bi taybetî seba ke prosesê çareserîye biqedo ame girankerdene. Tirkîya û Kurdîstan zî ameyî tecrîdkerdene. Cinî, doman, ciwan, sîyaseto demokratîk, dezgehê komelê sivîlî ameyî tecrîdkerdene. Nêbo ke merdim tecrîd têna yew hetî ra biercno. Tecrîdê Îmraliyî vilayê her cayî bîyo. Îqtîdar wazeno pê rayîrê tecrîdî polîtîkayanê şerî rê dewam bikero. Iraq, Zap, Şingal de konseptê şerî ano ca. Wazenê îradeyê çar parçeyanê Kurdîstanî bişikno.

Rayraşîyayîşê Gemlîkî prosesê winasênî de ame kerdene. Hînî sebrê şarê kurdî nêmendo û azadîya Ocalanî wazeno. Abdullah Ocalan wazeno mîsyonê xo yê haştîye bîyaro ca. La hukmat şer de israr keno. Bi polîtîkayanê şerê taybetî û asîmîlasyonî ê do ser nêkewê. Hukmat çend manîpule bikero zî  Rayraşîyayîşê Gemlîkî de têna qîrayîşê 'Ma wazenê Abdullah Ocalan azad bibo' ame eşnawitene. Sere de hukmat ganî her kes nê mesajî hol fam bikero.''