Îqtîdarê AKP-MHPyî 3 serr ê ke Wan de çalakî û nawnayîşî qedexe kerdî. Nê qedexeyî bi hawayêkê nîzamî her 15 rojan de rayêk yenê dergkerdene. Qedexeyo ke 21ê teşrîna peyêna 2016î de dest pêkerd hezar û 130 rojan ra nata dewam keno. Qedexeyê çalakî û nawnayîşan reyde binpaykerdişê heqan zî bîyî zêde. Goreyê doneyan ê Şubeyê Wanî yê Komeleya Heqanê Merdiman (ÎHD) serra 2016î ra heta peynîya kanûna 2019î Wan de 24 hezar û 500 reyî heqê merdiman ameyî binpaykerdene.

Mabênê 4 serranê peyênan de bi temamî 2 hezar û 100 reyî serebûtê sereştişê keyeyan ameyî meydan, 2 hezar û 900 kesî ameyî destbendkerdene û 635ê înan zî ameyî tepiştene. Wan de hema hema pêro kuçe û taxan hetê polîsan ra ameyî dormegirewtene. Kuçeyê Maraşî, Cumhurîyetî, Kazim Karabekîrî, Sihke û Îskele yê ke kuçeyê tewrx bisixletî yê şaristanî yê her tim bi wesayîtanê zirxînan yenê girewtene.

Rewşa Îstîsnayî ra Wan de cuye û keyeyê merdiman hînî biasayîşî nîyê. Dikandarî hînî nêeşkenê kar bikê. Dima ke 19ê tebaxa 2019î de Şaredarîya Şaristanê Pîlî ya Wanî ya HDPyî ameye xespkerdene tedaya vera dikandaranê Wanî bîye zêde. Herêmê Hunerî, Çand, Şemsîye yê ke merkezê Wanî de yê şar bi giranî zîyaretê nê cayan keno tim benê hedefê sereştişanê polîsan.

Zaf karsazî ameyî debtbendkerdene, cayê karî yenê girewtene û dikandarî zî benê hedefê tedaya polîsan. AKPyo ke her weçînayîş de Wan de bin keweno qesasê xo şar û dikandaran ra gêno. Şar zî îfade keno ke ê do sereyê xo verê zorbazîya AKPyî çewt nêkerê.