Serra 2016î ra nata Colemêrg û qezayanê ci de pêro çalakîyî qedexe yê. Pêro Colemêrg de bi seyan herêm û wareyî sey 'herêma taybete ya asayîşî' yenê îlankerdene. Destûr nêdîyeno ke merdimî şorê wareyan û heywananê xo weye bikerê. Herêmanê sînorî de zî merdimî hetê leşkeranê tirkan ra kişîyenê.

Îdarekarê Komeleya Heqanê Merdiman (ÎHD) ya Colemêrgî Avûkat Eren Baskinî derheqê binpaykerdişê heqan ê Colemêrgî de ANFyî rê qisey kerd.

Baskinî madeya 3. ya Qanûnê Bingeyî viste vîrî û vat ke ganî goreyê na made merdimî bieşkê kombîyayîş, aktîvîte û çalakîyan bi hawayêkê azadî bikerê la na made bi temamî werte ra wedarîyaya.

Baskinî ard ziwan ke Colemêrg û qezayanê ci de AKP û hemkaranê ci ra ber destûr nêdîyeno çewî ke kampanya û çalakîyan bikerê û pêro muracatê semedê ney yenê redkerdene.

Baskinî vat: ''Nika şaristan de bi hawayêkê fîîlî Rewşa Îstîsnayîye yena caardene. Na rewşe de pawitoxîya heqanê merdiman zî zor û zehmet a. Ma xîret kenê ke xo biresnê pêro binpaykerdişanê heqanê merdiman. Îdareyê ma nê rewşan qeyd û teqîb kenê.''