Rêxistina Qezaya Rêya Armûşê ya HDPyî rixmê zor û zehmetîyan û astengkerdişê dewleta tirke zî xebatanê endamîye dewam kena. Hemserekê HDPyî yê Rêya Armûşê Tuncer Sagniçî vat ke şar rixmê tedaya polîsan ê tirkan zî seba endamîye qeydê xo virazeno.

Sagniçî pare kerd ke  xebatê înan ê tax û kuçeyan asteng benê û vat: ''Polîsî nêverdenê ke ma kom bibê. Coka ma merkezê partîye de xebatanê xo kenê.''

Sagniçî îfade kerd ke şar zaf eleqe mojneno kampanyaya endamîye û vat: ''Awanbîyayîşê HDPyî ra nata xebatê endamîye tim yenê kerdene. Operasyonanê peyênan ra dima endamê ma zêdîyayî. Na rewşe ma kêfweş kena. 500 rojan ra nata Wan de çalakî û aktîvîteyî qedexe yê. Ma vera ney prosesê mehkeme daye destpêkerdene. Ma nêeşkenê standan akerê, broşuran vila bikerê. Rixmê nê çîyan zî şar yeno û beno endamê ma. No zî moralêkê pîlî dano ma.''