Tirkîya vîrusê Korona bi lezî vila beno. Seba zîndananê ke cayanê tewr birîskan ra yê hema zî sey tebdîrî weçînayîşêk nêame kerdene. Merdimanê tepişteyanê Zîndanê Amedî pare kerd ke seba ke verê  vilabîyayîşê vîrusî bêo girewtene ganî gamêke bêra eştene.

Dadîya Umît Ozkano ke Zîndanê Amedî de tepişte yo Ummuhane Ozkan îfade kerd ke tebdîrê zîndanan têna wedaritişê pêvînayîşan o. Ummuhane Ozkan ard ziwan ke wextêkê nêzdîyî de ekîpanê cendirmeyan û gardîyanan ê bi  kesan eşt koxuşan ser û cigêrayîş kerd. Ozkane vat: ''Her ca de seba mesafeyê komelkîyî hîşyarîye yena kerdene. La zîndanan de cendirmeyan û gardîyanan bêtebdîr koxuşan de cigêrayîş kerdo. Zîndan de dezenfektan û awa kincan bi vaya zêde yenê rotene. Maske û lapikî zî nênê rotene, koxuşî dezenfekte nêbenê.''

Ummuhane Ozkan da zanayene ke eke vîrus zîndanan de vila bibo felaketêk do biqewimo 3u waşt ke tepişteyî cade bêrê veradayene.

Dadîya tepişteyê zîndanê Amedî Ramazan Yilmazî Sebrîze Yilmaz zî vat ke lajê ci hîrê reyan qelbê xo ra anjîyo bi. Sebrîze Yilmaz venga Wezaretê Edaletî û Serekkomarîye da ke tepişteyî bêrê veradayene û dadîyî hînî seba domananê xo dej nêancê.

Di lajê Şafî Haymeyî zî zîndan de tepişte yê. Şafî Haymeyî vat: ''Hînî ma nêeşkenê postane ra zî domananê xo rê pere bierşawê. Ma zaf qerqilîyenê. Çunke çew xîret nêkeno ke verê nê janî bigêro. Ma wazenê ke tepişteyî cade bêrê veradayene.''